திருவாய்மொழிப் பாசுரங்களின் சிறப்பு - TVM1

வந்தாய் போலே வாராதாய். வாரா தாய்போல் வருவானே,
செந்தா மரைக்கண் செங்கனிவாய் நால்தோ ளமுதே. எனதுயிரே,
சிந்தா மணிகள் பகரல்லைப் பகல்செய் திருவேங் கடத்தானே,
அந்தோ! அடியேன் உன்பாதம் அகல கில்லேன் இறையுமே.

வருவாய் என எண்ணும்போது வரமாட்டாய், வரமாட்டாய் என எண்ணும்போது வந்தருள்வாய்! தாமரை போன்ற கண்களும், சிவந்த இதழ்கள் கூடிய வாயும், அகண்ட தோள்களும் கொண்ட என் உயிருக்கு ஒப்பானவனே! இருள் போன்ற என் அல்லல்களையும், பாவங்களையும் துடைக்கும் ஒளியான வேங்கடேசப் பெருமானே! நான் உன் பாதங்களை விட்டுப் பிரியாமல் இருக்கும் நிலையை வேண்டினேன் ஐயனே!
*************************

அகல கில்லேன் இறையும் என் றலர்மேல் மங்கை யுறைமார்பா,
நிகரில் புகழாய். உலகமூன் றுடையாய். என்னை ஆள்வானே,
நிகரில் அமரர் முனிக்கணங்கள் விரும்பும் திருவேங் கடத்தானே,
புகலொன் றில்லா அடியேனுன் அடிக்கீழமர்ந்து புகுந்தேனே.

அலர்மேல் மங்கை எனும் இலக்குமி குடி கொண்டிருக்கும் திருமார்பனே! உன்னை விட்டு பிரியா நிலை வேண்டினேன். வானுலகம், பூமி, பாதாளம் ஆகிய மூன்று உலகங்களுக்கு அதிபதியே! என் அரசனே! தேவர்களும், முனிவர்களும் நேசிக்கும் திருவேங்கடம் வாழ் பெருமானே! உன் திருவடியைத் தவிர வேறொரு புகலிடமும் இல்லாத நான், உன்னிடம் தஞ்சமடைந்தேனே!
***********************************

பெருமான் எங்கிருக்கிறான், எப்படிப்பட்டவன் என்ற கேள்விக்கு, நம்மாழ்வார் பதிலாக வழங்கியது போல் உள்ளது இப்பாசுரம்:

உளன் எனில் உளன் அவன் உருவம் இவ்வுருவுகள்.
உளன் அலன் எனில் அலன் அவன் அருவமிவ்வருவுகள்
உளனென இலனென அவைகுணமுடைமையில்
உளன் இரு தகைமையோடு ஓழிவிலன் பரந்தே

அவன் இருக்கிறான் என்பவர்க்கு உருவமான ஸ்தூல சரீரமாகவும், அவன் இல்லையென்பார்க்கு அருவமான சூட்சும சரீரமாகவும் இரு வகைப்பட்ட தன்மைகளை உடையவனாக அந்த பரந்தாமன் இருப்பதால், என்றும் (Eternal) எங்கும் வியாபித்து (all pervading) இருக்கும் நிலை கொண்டவன் அவனே !
********************************

எளிமை தான் நம்மாழ்வரின் வழி:

அற்றது பற்றெனில்
உற்றது வீடு உயிர்
செற்றது மன்னுறில்
அற்றிறை பற்றே

பற்றை ஒழித்தால், ஆன்மா உய்வுறும். உலக பந்தங்கள் அனைத்தையும் விட்டொழித்து, அவ்விறைவனின் திருவடி சேர்க !
******************************

நாராயணன் தான் சகலமும் என்கிறது இப்பாசுரம்:

ஒன்றும் தேவும் உலகும் உயிரும் மற்றும் யாதும் இல்லா
அன்று நான்முகன் தன்னோடு தேவர் உலகோடு உயிர் படைத்தான்
குன்றம் போல் மணி மாடம் நீடு திருக்குருகூர் அதனுள்
நின்ற ஆதிப் பிரான் நிற்க மற்றைத் தெய்வம் நாடுதிரே

தேவரும், உலகங்களும், மன்னுயிர்களும் மற்றும் எதுவுமே தோன்றாத காலத்தே, பிரம்மனையும், தேவர்களையும், உலகங்களையும், உயிர்களையும் படைத்தவன் அப்பரந்தாமனே ஆவான். குன்றுகளை ஒத்த அழகிய மாடங்கள் உடைய திருக்குருகூரில் எழுந்தருளியிருக்கும் ஆதிநாதனைத் தவிர வேறெந்த கடவுளரையும் நாட வேண்டியதில்லை !
****************************

இப்பாசுரத்தில், நம்மாழ்வார் கலியுக மாந்தர்க்கு மிகுந்த நம்பிக்கையளிக்கிறார் !

பொலிக! பொலிக! பொலிக! போயிற்று வல்லுயிர்ச் சாபம்,
நலியும் நரகமும் நைந்த நமனுக்கு இங்கு யாதொன்று மில்லை,
கலியும் கெடும் கண்டு கொள்மின் கடல்வண்ணன் பூதங்கள் மண்மேல்,
மலியப் புகுந்து இசைபாடி ஆடி உழிதரக் கண்டோம்

கொடிய சாபங்கள் நீங்கி விட்டதால், மகிழ்ச்சி கொள்க ! நரகத்தை ஆளும் யமனுக்கு இங்கே வேலையில்லை ! கடல்வண்ணனான பரந்தாமனின் உறைவிடமான வைகுந்தத்தில் உள்ள பூதகணங்கள், மனித உருவெடுத்து, இப்பூவுலகிற்கு வந்து, தங்கள் நிலை மறந்த பேருவகையில் (ecstasy) அப்பரந்தாமனை போற்றிப் பாடியாடுவதைக் காண்கையில், இக்கலியும், அல்லல்களும் முடிவுறும் என்பதை உணர்க !
*****************************

கீழ்க்கண்ட திருப்பாசுரங்களில் காணப்படும் பக்திப் பேருவகையும், பூரண சரணாகதியும், வாசிப்பவரின் உள்ளத்தை உருக்க வல்லது !

எனதாவியுள் கலந்த* பெருநல்லுதவிக்கைம்மாறு,*
எனதாவி தந்தொழிந்தேன்* இனிமீள்வதென்பது உண்டே,*
எனதாவியாவியும் நீ* பொழிலேழும் உண்ட எந்தாய்,*
எனதாவியார் யான் ஆர்?* தந்த நீ கொண்டாக்கினையே. 2.3.4

என் உயிரில் ஒன்றறக் கலந்து, நீ அருளிச் செய்த அரியதோர் உதவிக்கு பதிலாக என்னுயிரை உனக்குரியது ஆக்கினேன், ஐயனே ! அவ்வாறு என்னுயிரை ஈந்த பின்னர் உன்னிடமிருந்து யான் விலகுவதோ, மீள்வதோ இயலாத காரியம் ஆயிற்றே ! என் ஆன்மாவின் வித்தாக இருப்பவனும் நீயே ! பிரளய காலத்தில், ஏழு வகைப்பட்ட உலகங்களைக் காக்க வேண்டி அவற்றை உன் திருவயிற்றில் வைத்து ரட்சித்த உனக்கு, நீ கொடுத்த என்னுயிரை உனக்கே திருப்பித் தர நான் யார் ? கொடுத்த என் சுவாமி நீயே அதை உனதாக்கிக் கொண்டு என்னை உய்வுற வைத்தாய் !
******************

தானோர் உருவே தனிவித்தாய்த்
தன்னின் மூவர் முதலாய
வானோர் பலரும் முனிவரும்
மற்றும் மற்றும் முற்றுமாய்த்
தானோர் பெருநீர் தன்னுள்ளே
தோற்றி அதனுள் கண்வளரும்
வானோர் பெருமான் மாமாயன்
வைகுந்தன் எம் பெருமானே

ஆதிபிரானே நாம் காணும் உணரும் அனைத்துக்கும் முதற்காரணனாய், துணைக்காரணனாய், நிமித்த காரணனாய் திகழ்கிறான். தானே பிரம்மன், ஈசன், இந்திரன் ஆகிய மூவராகி, அதன் மூலம் தேவர்களையும், முனிவர்களையும், மற்றும் மனிதர்களையும், விலங்குகளையும், ஏனைய அசையும் மற்றும் அசையாப் பொருட்களையும் படைப்பிக்க வேண்டி ஓர் பிரளய வெள்ளத்தை உருவாக்கி, அதில் யோக நித்திரையில் ஆழ்ந்திருப்பவன் ! நித்யசூரிகளின் தலைவனான, எம்பெருமான் உணர்வதற்கரிய, அதிசயமான குணங்களை உடையவன் ! அப்பெருமானே பேரின்ப வீடான பரமபதத்தின் நாயகனும் ஆவான் !
******************

என்னுள் கலந்தவன் செங்கனிவாய் செங்கமலம்
மின்னும் சுடர்மலைக்குக் கண், பாதம், கை கமலம்
மன்னும் முழுஏழ் உலகும் வயிற்றின் உள
தன்னுள் கலவாதது எப்பொருளும் தான் இலையே

என்னுயிரில் கலந்து என்னை ஆட்கொண்ட எம்பெருமான் பேரொளி வீசும் பெருமலை போன்றவன் ! அவனது அழகிய சிவந்த உதடுகள், திருக்கண்கள், திருக்கைகள் மற்றும் திருவடிகள் யாவும் தாமரை மலர் போன்றவையே ! ஏழு உலகங்களையும் அவன் திருவயிற்றில் வைத்து ரட்சித்து, அவனே யாதுமாகி நிற்பதால், அவனுள் கலவாத, அவனுக்கு அப்பாற்பட்ட, பொருள் என்பதே கிடையாது !
**********************
என்றென்றும் அன்புடன்
பாலா

### 258 ###

ஈ.வெ.ரா ஏற்படுத்திய தாக்கம் !

பெரியார் குறித்து சமீபத்தில் (டோண்டுவின் "சமீபத்தில்" அல்ல:)) வாசித்தறிந்த இரண்டு நிகழ்வுகளை பகிர்ந்து கொள்ளும் எண்ணத்துடன்:

நிகழ்வு ஒன்று:
----------------------
கஸ்தூரி ஸ்ரீநிவாஸன் பற்றி கேள்விப்பட்டிருப்பீர்கள். ஹிந்து நாளிதழ் குடும்பத்தைச் சேர்ந்தவர். ஒரு முறை, மதச்சடங்குகளில் நம்பிக்கை இல்லாத அவரது மாமா ஒருவர், கஸ்தூரி அவர்களின் பால்ய வயதில், அவரை கோயமுத்தூரில் பெரியார் கலந்து கொண்ட அரசியல் கூட்டத்திற்கு அழைத்துச் சென்றார்.

பல வருடங்களுக்கு பின் அப்பேச்சை நினைவு கூர்ந்த கஸ்தூரி, "பெரியார் ஒரு திறமையான பேச்சாளர், தன் வாதத்திறமையால் கேட்பவரை கட்டிப் போடுவதிலும், சிந்திக்க வைப்பதிலும் வல்லவர் ! அன்று, பெரியார், 'கடவுள் என்ற ஒருவர் உண்மையில் இருந்தால், மின்சாரத்தையும் வானொலியையும் கண்டுபிடித்த மனிதன், இந்நேரம் அவரைக் கண்டு பிடித்திருப்பான் ! கடவுள் என்று எதுவும் இல்லை ! பார்ப்பனர் சக மனிதரை தமக்குக் கீழேயே வைத்திருக்கும் உபாயமாக, கடவுள் என்ற மூட நம்பிக்கையை கண்டு பிடித்தனர் ! நான் கூறுவது அக்கிரமமானது என்றால், அவர்கள் எனக்கு சாபம் தரட்டும். ஆனால், அச்சாபம் என்னை ஒன்றும் செய்ய முடியாது, ஏனெனில், நான் எதன் மேலும் குருட்டு நம்பிக்கை வைப்பது இல்லை' என்று முழங்கியவர், அதன் தொடர்ச்சியாக, 'என்னுடைய இந்தச் சவாலை இங்கிருக்கும் நாமம் போட்ட மடையன் யாராவது ஏற்கத் தயாரா ?' என்று அறைகூவலிட, நான் (கஸ்தூரி), அன்று நாமம் போட்டிருந்த காரணத்தால், தலையை தாழ்த்திக் கொண்டேன்!" என்று கூறியிருக்கிறார்.

பெரியாரின் அப்பேச்சு ஏற்படுத்திய தாக்கம் குறித்து கஸ்தூரி கூறுகையில், " அன்றிலிருந்து நான் கோயிலுக்குச் செல்வதை நிறுத்திக் கொண்டேன் ! நாமம் அணிவதில்லை ! கடவுள் பெயரால் உபவாசம் இருப்பதில்லை ! கேட்க விருப்பமுள்ளவர் பலரிடமும் பெரியாரின் கொள்கைகள் குறித்து எடுத்துரைக்கத் தொடங்கினேன். அத்தோடு நில்லாமல், எனது இந்த 'சுய விடுதலை'யை பறைசாற்ற நான் மிகவும் வெறுத்த புலால் உணவை உண்ண ஆரம்பித்தேன் ! அதுவே நான் புதிதாக உணர்ந்த சுதந்திரத்தை வெளிப்படுத்த ஒரு சிறந்த வழியாக எனக்கு புலப்பட்டது" என்றும் சொல்லியுள்ளதை வாசிக்கும்போது, வாசிப்பவர்க்கு ஒரு வித பிரமிப்பும் ஆச்சரியமும் ஏற்படலாம். அதாவது, கடவுள் நம்பிக்கை மிக்க, ஓர் ஆசாரமான குடும்பத்திலிருந்து வந்த ஒருவர் மீது பெரியாரின் பேச்சு எந்த அளவு தாக்கத்தை உண்டு பண்ணியது என்பதை பார்க்கும்போது !!!

நிகழ்வு இரண்டு:
------------------------
பெரியார் அறிஞர் அண்ணாவுடன் ஒரு மேடைப் பேச்சுக்காக, 1944-இல், சிதம்பரம் அருகில் உள்ள பூந்தோட்டம் என்ற கிராமத்திற்கு சென்றிருந்தார். அவரது அன்றைய மேடை முழக்கத்திற்குப் பின் எதிர்பார்க்க முடியாத வியத்தகு மாற்றங்கள் நிகழ்ந்தன ! மொத்த கிராமமும் நாத்திகத்தைத் தழுவியது ! கிராமத்திலிருந்த வேணுகோபால சுவாமி திருக்கோயில் மூடப்பட்டது. கிராமத்தில் இருந்த விநாயகர் கோயில் இடிக்கப்பட்டு விக்ரகம் ஏரியில் வீசி எறியப்பட்டது ! கிராம மக்கள் அனைத்து மதச்சடங்குகளையும் துறந்தனர் ! இன்று கூட, அக்கிராமத்தில் பார்ப்பனரில்லா சுயமரியாதைத் திருமணங்கள் மட்டுமே நடைபெறுகின்றன. அது போலவே, ஈமச் சடங்குகளும் யாரும் செய்வது கிடையாது.

மேற்கூறிய இரண்டும் அசாதாரண நிகழ்வுகளும், ஈ.வெ.ரா என்ற தனி மனிதரின் (இயக்கத்தை இத்துடன் இணைக்க விரும்பவில்லை!) அரசியல் பேச்சுகள் ஏற்படுத்திய தாக்கத்தின் வீரியத்தை விளக்குவதற்கு மட்டுமே ! ஈ.வெ.ரா (தனி மனித வாழ்க்கையில் அவரும் பல தவறுகள் செய்திருந்தாலும், சமயங்களில், அவருக்கு அப்போது மக்கள் அளித்த ஆதரவின் போதையில் எல்லை மீறிய அபத்தச் செயல்களில் ஈடுபட்டிருந்தாலும்!) ஒரு நல்ல சிந்தனையாளர், சிறந்த பேச்சாளர் என்பதற்கு சான்றாக இவ்விரு நிகழ்வுகளையும் பார்க்க முடிகிறது !

எ.அ.பாலா

#$% 257 #$%

ஜெ வீட்டில் நுழைந்த மர்ம நபர்

இட்லி வடையாரை முந்திக் கொண்டு ஒரு அரசியல் செய்தியை தருவதில் பெரு மகிழ்ச்சி அடைகிறேன்.

சற்று முன் மக்கள் டிவியில் கேட்ட ஒரு செய்தி:

முன்னாள் முதல்வர் ஜெ வீட்டுக்குள், வாயிலில் இருந்த காவலரை கத்தியை காட்டி மிரட்டி, ஒரு மர்ம நபர் நுழைந்துள்ளார். பின்னர் அவரை, இன்னும் சிலருடன் சேர்ந்து கொண்டு காவலர் பிடிக்க முயற்சித்தபோது, அதே கத்தியை காட்டி மிரட்டி விட்டு தப்பித்து ஓடி விட்டார் !!! பின்னர், எப்பொழுதும் போல, போலீஸ் வலை வீசித் தேடி அந்த மர்ம நபரை தேடிப் பிடித்து கைது செய்து விட்டனர். அவரை ஆழ்வார்பேட்டை காவல் நிலையத்தில் வைத்து விசாரணை நடத்தி வருகின்றனர்.

ஜெயின் வக்கீல், முன்னாள் முதல்வருக்கு கொடுக்கப்பட்ட பாதுகாப்பு குறைக்கப்பட்டதே, இந்த சம்பவத்திற்குக் காரணம் என்று நிருபர்களிடம் கூறினார். மேல் விவரங்களை "இட்லி வடை" நாளை தருவார் என்று எதிர்பார்க்கிறேன்.

எ.அ.பாலா

$$$ 256 $$$

உயிர் வாழ உதவி வேண்டி !

அன்பு வலைப்பதிவுலக நண்பர்களே,
சற்று சிரமம் பார்க்காமல் இப்பதிவை வாசித்து விடவும் என்ற வேண்டுகோளுடன்:
******************************
தமிழ் வலையுலகில் பதியத் தொடங்கிய காலத்தில் எனக்கு அறிமுகமான அன்புக்குரிய நண்பர் சிங்கை அன்பு, இன்று ஒரு மின்மடல் அனுப்பியிருந்தார். விவரங்களுக்கு அவரது உயிர் வாழ உதவி நாடி பதிவை வாசிக்கவும், இயன்ற அளவில் உதவி செய்யுமாறு உங்களிடம் வேண்டுகோள் வைக்கிறேன்.

அன்பு தற்போது அவ்வளவாக வலை பதிவதில்லை என்பதாலேயே, அவரது வேண்டுகோள் பதிவின் தொடுப்பை தருவதற்காக, இப்பதிவை இடுகிறேன். நன்றி.
****************************
நண்பர் சிங்கை அன்பு அவர்களின் பதிவு:
Sun 5 Nov 2006
உயிர்வாழ உதவி நாடி…
Posted by அன்பு under அனுபவம்/நிகழ்வுகள்

இனிய வலையுலக நண்பர்களுக்கு வணக்கம். நீண்டநாட்களாக வலைப்பதியாமல் இருந்தாலும் ஒரு நல்ல செயலுக்கு உதவும் பொருட்டு இந்த பதிவு.

கடந்த 29 அக்டோபர் 2006 ஞாயிறு - ஹிந்து நாளிதழில் ஸ்வேதா எனும் நான்கு வயது குழந்தை உயிர்வாழ உதவி நாடி ஒரு வேண்டுகோள் வந்திருக்கிறது. ஸ்வேதா, ‘இருதயத்தில் ஓட்டை’ என பொதுவாக அறியப்படும் Atrial Septal Defect(ASD) என்ற பிரச்னையால் அவதியுறுகிறாள். தற்போது சென்னை - ராமச்சந்திரா மருத்துவமனையின் கண்காணிப்பில் இருப்பதாகவும், அந்த துளையை அடைக்க “திறந்த இருதய அறுவைச்சிகிச்சை” தேவைப்படுகிறதாம். குழந்தைக்கு இருக்கும் இந்தப் பிரச்சினையே நம்மை கலவரப்படுத்தும்போது - சிகிச்சைக்கு ரூபாய் 1,25,000/- என்று குறிப்பிடப்பட்டு பணப்பிரச்னையால் - அறுவைச் சிகிச்சைக்காக இன்னும் நாள் குறிக்கப்படாமல் - ஸ்வேதா சிரமப்படுகிறாள்.

ஸ்வேதாவுக்கு உதவ, இந்தக் குட்டிக்குழந்தை தொடர்ந்து உயிர்வாழ உங்கள் உதவி மிக அவசியம். உங்களால் இயன்ற உதவியை தயவுசெய்து செய்யவும். நல்ல விஷயங்களை இன்றே, இப்பொழுதே செய்ய வேண்டும் என்று கூறுவார்கள் அதனால் நாமும் இப்போதே ஆரம்பிப்போமே.

(வலக்கை - இடக்கை - சொற்றொடரும் ஞாபகம் வந்தாலும்) தற்போது என்னால் இயன்ற தொகையாக ரூ. 10,000 அளிக்க முடிவெடுத்துள்ளேன், நண்பர்களே தொடருங்கள்…

இன்று இது விஷயமாக தொடர்புகொண்டவுடன் ‘என்றென்றும் அன்புடன்’ பாலா, உடனே மருத்துவமனையை தொடர்புகொண்டு மேல்விபரம் பெற்று என்னிடம் தெரிவித்தார். கவுசல்யா-வின் படிப்புக்காக என்று ஆரம்பித்து நமது வலைப்பதிவாளர்களை நற்செயலில் ஈடுபடுத்தியவர். இதிலும் எல்லா உதவியும் செய்வதாக உறுதி அளித்துள்ளார். அதனால் உங்களது உறுதிமொழியை இங்கே அளித்தால் எப்படி பணம் அனுப்புவது என்பது பற்றிய மேல் விபரம் உங்களை தொடர்புகொண்டு தெரிவிப்போம். அல்லது நீங்களாகவே நேரடியாக அனுப்ப முடிவுசெய்தாலும் உங்கள் விருப்பபடி செய்யுங்கள். ஆனால் இன்றே… இப்பொழுதே…!

ஸ்வேதா விரைவில் பூரண குணம் அடைய என்னுடைய வேண்டுதலும், பிரார்த்தனைகளும்…

மேல் விபரங்களுக்கு: பாலா (balaji_ammu@yahoo.com), ராம்கி (rajni_ramki@yahoo.com) & அன்பு (lsanbu@gmail.com)

நீங்களே காசோலையாகவோ (Cheque), வரைவோலையகவோ (D.D) அனுப்ப விரும்பினால்,
Sri Ramachandra Hospital, A/c Baby S. Swetha என்ற எடுத்து
Sri Ramachandra Hospital, Porur, Chennai 600 116 என்ற முகவரிக்கு அனுப்பவும்.
மிக்க நன்றி.

என்றென்றும் அன்புடன்,
அன்பு

பி.கு: ASD என்னும் இதயதுளையை சரிசெய்ய open heart surgery இல்லாமல் ஒருவித பலூன் (Amplatzer - device closure) மூலமும் அடைக்க இயலும். முதலில் துளை இந்த பலூனால் அடைபட முடியுமளவு சிறியதாக இருக்கவேண்டும் மற்றப்படி இதற்குண்டான செலவு அதிகம். இதில் எந்த நிலையினால் ஸ்வேதாவுக்கு surgery என்று முடிவுசெய்தார்கள் தெரியவில்லை. அதனால் நம்மால் முடிந்த அளவு உதவி செய்து - குழந்தையை குறைந்த வலியுடன் இந்தப் பிரச்னையிலிருந்து விடுபட வழிசெய்வோம்.

*****************************
என்றென்றும் அன்புடன்
பாலா

### 255 ###

படிச்சுட்டு முடிஞ்சா சிரிங்க - 10

இல்லறம் = நல்லறம்
****************
ஒரு தம்பதி சற்று முன் அவர்களுக்கிடையே நடந்தேறியிருந்த சண்டைக்குப் பின்னர், காரில் பயணித்துக் கொண்டிருந்தனர். இருவருமே தங்கள் பக்கமே நியாயம் இருப்பதாக பிடிவாதமாக நம்பியதால் வெகு நேரம் ஒருவருடன் ஒருவர் பேசவில்லை. சாலையோரத்தில் புல்வெளியில் மேய்ந்து கொண்டிருந்த சில ஆடுகளையும், பன்றிகளையும் பார்த்த கணவன், மனைவியிடம் நக்கலாக, 'உன் உறவினரோ?' என்று வினவ, மனைவி ஆத்திரப்படாமல், "ஆம், என் மாமியார் குடும்பத்தினர் !" என்றார் :)

கேள்வியின் நாயகனே
*****************
ஒரு கணவர் ஒரு நாளில் ஆண்களை விட இரு மடங்கு சொற்களை பெண்டிர் பேச்சில் உபயோகிப்பதாக ஓர் ஆய்வுக்கட்டுரையில் எழுதப்பட்டிருப்பதாகக் கூறினார். உடனே, மனைவி, "அதற்குக் காரணம், பெண்கள் தாங்கள் ஆண்களிடம் ஒரு முறை கூறுவதை, திரும்பவும் கூற வேண்டியிருப்பதே!" என்று சொல்ல, கணவர் வினவினார், " என்ன?"

படைப்பின் ரகசியம்
***************
ஒரு கணவர் தன் மனைவியிடம், "ஒரே சமயத்தில், நீ மிக அழகாகவும், அதி முட்டாளாகவும் காணப்படுவது எப்படி என்பது எனக்குப் புரியவில்லை !" என்றதற்கு பதிலாக, மனைவி, "நான் விளக்குகிறேன் ! கடவுள் என்னை அழகாகப் படைத்தது, நான் உங்களைக் கவரவே, அதே நேரம், என்னை முட்டாளாக ஆக்கியது, நான் உங்களால் கவரப்படுவதற்காகவே !" என்றவுடன், கணவர் கப்சிப் :)

எஅ.பாலா

### 254 ###

திவ்ய தேசம் 6 - திருக்கண்டியூர்

இந்த வைணவ திவ்ய தேசம், திருவையாறிலிருந்து 2 கிமீ தொலைவில் அமைந்துள்ளது. ஹர சாப விமோசனப் பெருமாள், பலிநாதர் மற்றும் பிருகுநாதர் என்றழைக்கப்படும் இக்கோயிலின் மூலவர், நின்ற திருக்கோலத்தில் கிழக்கு நோக்கி காட்சியளிக்கிறார். உத்சவ மூர்த்தியின் திருநாமம் கமலநாதர். தாயார் கமலவல்லிக்கு தனி சன்னிதி உண்டு. தீர்த்தமும், விமானமும் முறையே கபால மோக்ஷ புஷ்கரிணி மற்றும் கமலாக்ருதி விமானம் என்றும் அறியப்படுகின்றன. நரசிம்மர், கருடாழ்வார், சக்கரத்தாழ்வார், பன்னிரு ஆழ்வார்கள் ஆகியோருக்கும் இங்கு தனி சன்னிதிகள் உள்ளன.

திருக்கரம்பனூரிலும், திருக்குறுங்குடியிலும் கூறப்படும் தல புராணமே, இங்கும் கூறப்படுகிறது. அதாவது, ஒரு முறை, கோபத்தில் சிவன் பிரம்மனின் ஐந்தாவது தலையை கிள்ளி எடுத்தபோது, அத்தலையின் ஓடு சிவனின் உள்ளங்கையில் ஒட்டிக் கொண்டதாகவும், மகாலஷ்மியிடமும், பெருமாளிடமும் அவ்வோட்டில் பிட்சை பெற்றதன் மூலம், சிவனுக்கு விமோசனம் கிடைத்ததாகவும், அதனாலேயே தலப்பெருமாள் (சிவபெருமானின் சாபத்தையே நீக்கியதால்!) ஹர சாப விமோசனப் பெருமாள் என்று திருநாமம் பெற்றதாகவும் தலபுராணம் சொல்கிறது.

இவ்வைணவ திருக்கோயில் இரண்டு பிரகாரங்களுடன் விஸ்தாரமாக காணப்படுகிறது. இங்குள்ள ராஜகோபுரம் மூன்று நிலைகள் கொண்டது. பிரம்மோத்சவம் பங்குனியில் சிறப்பாகக் கொண்டாடப்படுகிறது. திருமங்கையாழ்வார் மட்டும், திருக்குறுந்தாண்டகத்தில் ஒரே ஒரு பாசுரத்தில் இந்த திவ்ய தேசத்தை மங்களாசாசனம் செய்துள்ளார்:
***************************
2050@..
பிண்டியார் மண்டை ஏந்திப் * பிறர்மனை திரிதந்துண்ணும்-
உண்டியான்* சாபம் தீர்த்த ஒருவனூர்,* உலக மேத்தும்-
கண்டியூர் அரங்கம் மெய்யம் * கச்சிபேர் மல்லை என்று-
மண்டினார்,* உய்யல் அல்லால் * மற்றையார்க்கு உய்யலாமே? (2)

பிரம்மனின் (பிடுங்கப்பட்ட ஐந்தாவது தலையின்) ஓட்டை கையில் ஏந்தி, பிட்சை பெற்று உண்ட சிவபெருமானுக்கு சாப விமோசனம் அளித்தவன், உலகம் போற்றும் திருக்கண்டியூரில் அருள் பாலிக்கிறான். திருவரங்கம், திருமெய்யம், திருக்கடல் மல்லை ஆகிய தலங்களிலும் எழுந்தருளியிருக்கும் அப்பிரானை வணங்கி, அவன் திருவடி பற்றி உய்வு பெறுவதை விடுத்து நமக்கு வேறு வழியில்லை !
*****************************

திருவையாறில் அமைந்துள்ள (தேவாரத்தில்) பாடப் பெற்ற பஞ்சனாதீஸ்வரர் ஆலயத்தின் சப்தஸ்தானங்களில் ஒன்றாகவும் திருக்கண்டியூர் போற்றப்படுகிறது என்பது குறிப்பிடத்தக்கது. மேலும், பெருமாள் கோயிலுக்கு அருகிலேயே திருக்கண்டியூர் வீரட்ட சிவாலயம், சைவ-வைணவ ஓற்றுமைக்கு சான்றாக அமைந்துள்ளது ! சிவாலயத்தில் பிரம்மனுக்கும், சரஸ்வதி தேவிக்கும் சன்னிதிகள் உள்ளன.

உபரித் தகவல்:
திருக்கண்டியூருக்கு அருகே கல்யாணபுரம் என்ற பசுமையான கிராமத்தில் கல்யாண வேங்கடசுவரர் கோயில் ஒன்று அமைந்துள்ளது. ஒரு காலத்தில் தஞ்சாவூரை ஆண்ட மராத்திய மன்னனின் துணைவியின் (பெயர்: கல்யாணி) நினைவாகவே கல்யாணபுரம் என்ற பெயரை இக்கிராமம் பெற்றது என்று கூறப்படுகிறது. தியாகப்பிரம்மம் வழிபட்ட புண்ணியத் தலமிது ! வைணவப் பெருந்தகைகள் பலரும் கல்யாணபுரத்தை விசேஷமான தலமாகக் குறிப்பிடுகிறார்கள்.

பிரம்மாண்ட புராணத்தில், திருக்கண்டியூர் மற்றும் அதனருகில் உள்ள ஸ்ரீநிவாஸ ஷேத்திரம் பற்றிய குறிப்புகள் உள்ளதால், கல்யாணபுரக் கோயில், மிகப் பழமை வாய்ந்ததாக நம்பப்படுகிறது ! தாயாருக்கு அலர்மேல் மங்கை என்ற திருநாமம். இங்குள்ள உத்சவ விக்ரகம், முதலில் திருப்பதியில் இருந்து, பின்னர் இங்கு எடுத்து வரப்பட்டு பிரதிஷ்டை செய்யப்பெற்றது.

வருடம் முழுதும், இக்கோயிலில் விழாக்களும், உத்சவங்களும் நடைபெறுகின்றன. சித்திரையில் வசந்த உத்சவமும், அட்சய திருதியையும், வைகாசியில் விசாக உத்சவமும், நவராத்திரியும், தீபாவளியும், கார்த்திகையும் வெகு சிறப்பாகக் கொண்டாடப்படுகின்றன. இங்கு தினமும் கருடசேவை நடைபெறுகிறது என்ற தகவல் ஆச்சரியத்தை தரும் !

சுதர்சன ஆழ்வாருக்கும், உடையவர் ராமானுஜருக்கும், பன்னிரு ஆழ்வார்களுக்கும் தனிச் சன்னிதிகள் இங்கு உள்ளன. கண்ணாடி அறையும் உண்டு. சென்ற வருடம் கோயில் சீரமைக்கப்பட்டு, கும்பாபிஷேகம் விமரிசையாக நடைபெற, ஆயிரக்கணக்கில் பக்தர்கள் கலந்து கொண்டு பெருமாளை தரிசித்து மகிழ்ந்தனர்.

என்றென்றும் அன்புடன்
பாலா

### 253 ###

நியோ பார்ப்பனீயம்

எனது க்ரீமி லேயர் பதிவிற்கு பின்னூட்டமிட நினைத்த கி.அ.அ. (கிராமத்து அரட்டை அரசியல்) அனானி, அது சற்று நீண்டு விட்டதால், மேட்டரை மெயிலில் அனுப்பி, அதை ஒரு பதிவாக இடும்படி வேண்டுகோள் வைத்தார். 'இதில் என்ன இருக்கிறது' என்று அவர் வேண்டுகோளை நிறைவேற்றுகிறேன் :) இப்பதிவுக்கு வரும் பின்னூட்டங்களுக்கு கி.அ.அ.அ. அவர்களையே பதில் தருமாறு கேட்டுக் கொள்கிறேன் !!!
*****************

சமீபத்தில் இட ஒதுக்கீடு சம்மந்தமாக உச்சநீதி மன்றம் அளித்த தீர்ப்பு பரபரப்பை ஏற்படுத்தியுள்ளது. இட ஒதுக்கீட்டின் போது அந்தந்த சாதியில் பொருளாதார அடிப்படையில் ஏற்கனவே " வளர்ந்த பிரிவினரை" கணக்கில் எடுத்துக் கொள்ளவேண்டும். வேலை வாய்ப்பு மற்றும் பதவி உயர்வென்று வரும் போது அந்த சமுதாயங்களில் ஏற்கனவே எந்த சலுகையும் பெறாமல் பின் தங்கிய நிலையில் இருக்கும் மக்களாகப் பார்த்து அவர்களுக்கு மட்டுமே சலுகை அளிக்க வேண்டும் என சொல்லி இருக்கிறது.

உடனே இதை சாதீய தலைவர்களும் மற்றும் சமூக நீதிக் காவலர்களாக தம்மை பாவித்துக் கொண்டவர்களும் எதிர்க்க ஆரம்பித்து விட்டனர். இதை ஏதோ அரசியல் அமைப்புச் சட்டத்திற்கு புறம்பானது போலவும், நீதி மன்றங்களை ஆக்கிரமித்திருக்கும் முன்னேறிய வகுப்பினரின் சதி போலவும் திரித்தும் சித்தரித்தும் பேசியும் எழுதியும் வருகின்றனர்.இவர்களது இந்தக் கொந்தளிப்புக்கு என்ன காரணம் ? மேல் ஜாதியினர் ஆண்டாண்டு காலமாக செய்ததை " ஜாதி பிரிவினைகளை உண்டாக்கி சலுகைகளை தாங்களே அனுபவித்ததை " இவர்கள் இன்று தங்களது சாதிகளுக்குள்ளேயே செய்ய முற்பட்டுள்ளனர்.

ஆண்டாண்டு காலமாக பிற்படுத்தப்பட்ட மற்றும் தாழ்த்தப்பட்ட மக்களுக்கு சமுதாயத்தில் நிலை உயர ஒவ்வொரு கட்டத்திலும் இட ஒதுக்கீடு அவசியம் தேவை என்பதில் எந்த மாற்றுக்கருத்தும் இல்லை . பொருளாதார ரீதியாக வளர்ந்த பின்னும் சமூக ரீதியாக வளராத வரை இன்னும் சொல்லப் போனால் அனைவருடனும் சம அந்தஸ்து கிடைக்கும் வரை இடஒதுக்கீடு தேவை என்பது மறுக்க முடியாத உண்மை.

ஆனால் அதே சமயம் பிற்படுத்தப் பட்டோர், தாழ்த்தப் பட்டோர் என்ற போர்வையில் அதே பிரிவில் உள்ள சில "வளர்ந்த " பிரிவினர் மென் மேலும் சுக போகங்களை தாங்களே பகிர்ந்து கொண்டு அதே சாதியில் இருக்கும் உண்மையிலேயா கீழ்நிலையில் இருப்போருக்கு சலுகை மறைப்பு அல்லது மறுப்பு செய்ய முனைவதும் ஏற்க இயலாதது.

ஜாதீய அடிப்படையில் பிரிவுகள் உண்டாக்கி ஒரு பிரிவினர் ஆண்டாண்டு காலமாக அனுபவித்து வந்ததன் பெயர் "பார்ப்பனீயம் " என்றால் இதுவும் ஒருவகையில் " நியோ பார்ப்பனியம் " தான். என் சாதிக்காரன் மலம் அள்ளுகிறான் என கூக்குரலிடும் இவர்கள் யாரும் மலம் அள்ளவும் இல்லை அல்லது இவர்கள் சாதியில் மலம் அள்ளும் எவரையும் முன்னேற்ற முனையவுமில்லை. ஏனெனில் " இவர்கள் வீட்டு மலங்களை அள்ள யாரேனும் வேண்டுமே இந்த நியோ பார்ப்பனர்களுக்கு " இப்படிப் பட்ட" நியோ பார்ப்பனிசத்தையும்" ஒழிப்பதே உண்மையில் பிற்படுத்தப் பட்ட/தாழ்த்தப் பட்ட மக்களுக்கு செய்யும் நன்மை.
**************
நன்றி: கி.அ.அ.அனானி

*** 252 ***

கிராமத்து அரட்டை அரசியல் --- 6

கி.அ.அ.அனானி அனுப்பிய தொடரின் 6-வது பாகம்:
****************************

என்னடா மணி அங்க ஒரே சத்தமா இருக்கு ? பேப்பரிலிருந்து நிமிர்ந்து பார்த்த மூக்கையண்ணன் கேட்டார்.

""ஒரு பொம்பளை ரவுசு விட்டுக்கிட்டு இருக்குண்ணே..அண்ணன் கல்யாணத்துக்கு கோயிலுக்கு போச்சாம்...அங்க பக்கத்துல நின்னுக்கிட்டு இருந்த இதுக்கும் ஒரு தாலியைக் கட்டி கல்யாணத்தை பண்ணி வச்சுட்டாங்களாம்..அண்ணன் கல்யாணம் முடிஞ்ச கையோட, இந்தம்மாவக் கூப்பிட்டு இது பக்கத்துல நின்ன ஆளு கிட்ட ஒரு தாலியக் குடுத்து இது கழுத்துல கட்ட சொல்லிட்டாங்களாம்"""

"அடப்பாவி..."என்று விவேக் பாணியில் சவுண்டு விட்ட மலையாண்டி "இப்படியெல்லாம் கூடவா நடக்கும்.?..இந்தப் பொம்பளை கிட்ட கேக்கக் கூட இல்லையாமா?...அது சரி தாலி கட்டுர வரை இது மறுத்து பேசலையா..கம்முனு வாயில கொளுக்கட்டைய வச்சுக்கிட்டு நிண்டுக்கிட்டிருந்துச்சு? கூட இருந்த அண்ணன்காரனும் ஒண்ணும் சொல்லலியா ?" என்று கேள்விகளை அடுக்கினான்

"அண்ணன் கல்யாண மூடுல கம்முனு இருந்துட்டாராம்...இது அண்ணன் கல்யாணத்துல வச்சு அங்க இருந்த பெரியவங்களை எதுத்து பேச வேண்டாம் அப்படீன்னு "மரியாதை நிமித்தமா " கம்முனு இருந்துச்சாம்பா" என்றான் மணி

" அட என்னப்பா..இப்படியெல்லாம் கூடவா இருப்பாங்க ? அது சரி ..இந்தக் கூத்து எப்ப நடந்துச்சு ?இப்ப என்னாச்சு ? என்றார் மூக்கையண்ணன்

"அது ஆச்சுண்ணே நாலு மாசம்..இப்ப அந்த ஆளு கூட குடுத்தனம் நடத்தலை..அதுவுமில்லாம போன திருவிழால இது வேண்டாத ஒருத்தரப் பாத்து சிரிச்சு பேசிக்கிட்டு இருந்துச்சாம்.. அதனால கடுப்பாகிப் போய் தாலி கட்டுன ஆளு... இது எனக்கு பொண்டாட்டி இல்லை அப்படீன்னு வெட்டி வுட்டாராம்..இந்தப் பொம்பளையானா... மொதல்ல எனக்கு கண்ணாலமே ஆவலை ...இவரு யாரு அறுத்து வுட அப்படீன்னு ரவுசு விடுது.. "என்றான் மணி

"என்னாங்கடா சொல்றீங்க ...நாலு மாசமா கம்முனு இருந்துச்சா..ஊரெல்லாம் கல்யாணம் ஆயிருச்சு...கல்யாணம் ஆயிருச்சு அப்படீன்னு பேசியிருக்குமேடா இந்த நாலு மாசமா..அப்பவுமா கம்முனு இருந்துச்சு...அண்ணன் மரியாதை ..சபை மரியாதை அல்லாத்தையும் ரொம்ப காப்பாத்தியிருக்கப்பா....டேய் ...தியாக செம்மல்...குடத்திலிட்ட குத்து விளக்குடா..அந்தப் பொண்ணு " என்றார் மூக்கையண்ணன்...

" ரொம்ப ஓவரா பில்டப்பு குடுக்காதீங்க...தாலி கட்டுன ஆளு பாக்குறதுக்கு வெள்ளையுஞ் சொள்ளையுமா அளகா இருந்துருப்பார்..கடச்ச வரைக்கும் லாபம் ..அப்படியே பிக்கப் ஆயி போயிறலாம் அப்படீன்னு சும்மா இருந்திருக்கு..அப்புறம் அந்தாளுக்கு சொத்து பத்து ஒண்ணுமில்லையினு தெரிஞ்சப்புறம் இப்ப சவுண்டு விடுது " என்றான் மலையாண்டி.

" அது சரி..அந்தப் பொண்ணு பேரென்னடா " என்றார் மூக்கய்யண்ணன்

" ராதிகா " என்ற மலையாண்டியிடம் " அப்ப அண்ணன் பேரு ??? " என்று மணி கேட்க அங்கிருந்த அனைவரும் கொல்லென்று சிரிக்க ஆரம்பித்து விட்டனர்.

மலையாண்டி வடிவேலு ஸ்டைலில் "ஆரம்பிச்சுட்டாங்கையா...ஆரம்பிச்சுட்டாங்கையா " என்றபடி அங்கிருந்து நடையைக் கட்டினான்

250. க்ரீமி லேயர் குறித்து

உச்ச நீதிமன்றம் தனது சமீபத்திய தீர்ப்பில் SC/STக்கான (அரசுப்பணியில் பதவி உயர்வுக்கான) இடஒதுக்கீட்டில் க்ரீமி லேயரை வரையறுப்பதன் அவசியத்தை வலியுறுத்தியுள்ளது (தீர்ப்பின் முடிவாக இதைக் கூறவில்லை என்பது அறியத்தக்கது). இருந்தாலும், இது நிச்சயம் தேவையில்லாத ஒன்றே ! இத்தனை ஆண்டுகள் இடஒதுக்கீடு அமலில் இருந்தும் தலித் மற்றும் பழங்குடியினரின் பிரநிதித்துவம் பல துறைகளிலும் (முக்கியமாக உயர் பதவிகளில்) மிகக் குறைவாகவே உள்ளது என்பது கண்கூடு. அவர்களில் சிலர் நல்ல பதவியில் இருந்தாலும், உரிய அங்கீகாரம் கிடைப்பதில்லை ! அவர்களில் பெரும்பாலோர் (90 சதவிகிதத்துக்கும் மேலே) சமூகத்தில் உரிய அந்தஸ்து இன்னும் பெறவில்லை என்பதும் நிதர்சனம்.

OBC-க்கான க்ரீமி லேயர் 1992-இல் மண்டல் தீர்ப்பின்போது உச்ச நீதி மன்றத்தால் வரையறுக்கப்பட்டது. அதன் மூலம், OBC பிரிவில், உச்ச/உயர் நீதி மன்ற நீதிபதிகள், UPSC உறுப்பினர்கள், குரூப் A/B, கிளாஸ் I அல்லது II மாநில மற்றும் மத்திய அரசு அலுவலர்கள், பொதுத்துறை நிறுவன (PSU) அதிகாரிகள், ராணுவத்தில் கர்னல் பதவிக்கு மேல் இருப்பவர்கள் ஆகியோரது பிள்ளைகள் க்ரீமி லேயராக அறிவிக்கப்பட்டு, இடஒதுக்கீட்டிலிருந்து விலக்கப்பட்டனர். மேலும், வழக்குரைஞர்கள், மருத்துவர்கள், பொறியாளர்கள் மற்றும் சில புரொபஷனல் துறைகள் சார்ந்த வல்லுனர் ஆகியோரின் பிள்ளைகளும், வருடத்திற்கு இரண்டரை லட்சம் வருமானம் உள்ளவரின் பிள்ளைகளும், மண்டல் க்ரீமி லேயரில் அடங்குவர். OBC விஷயத்தில் இது தேவையான ஒன்றே.

ஆனால், இன்ன பிற பிற்படுத்தப்பட்டவருடன் ஒப்பு நோக்கும்போது சமூக நீதி என்ற இலக்கை அடைய தலித்துகள் பத்து மடங்கு தூரம் பயணிக்க வேண்டும் என்று நிச்சயம் கூற முடியும் ! தலித்துகளின் அவல நிலை தொடர்ந்து கொண்டு தான் இருக்கிறது. SC/ST க்காக ஒதுக்கப்பட்ட பணியிடங்கள் பல அரசுத் துறைகளில் பல காலமாக நிரப்பப்படாமல் இருப்பதையும் பார்க்கிறோம் ! மேலும், தற்போதைய தீர்ப்பு, SC/ST-க்கான க்ரீமி லேயரை வரையறுப்பது குறித்து தெளிவாக எதுவும் சொல்லவில்லை. OBC-க்கான க்ரீமி லேயர் வரையறுத்தலை தலித்துகளுக்கும் பழங்குடியினருக்கும் அப்ளை செய்வது சரியானதல்ல, ஏற்றுக் கொள்ளத் தக்கதும் அல்ல ! இதனால் குழப்பமே மிஞ்சும்.

அடுத்து, அரசுப்பணிகளில் OBC-க்கான இடஒதுக்கீட்டில் ஏற்கனவே செயல்பாட்டில் உள்ள க்ரீமி லேயர் விஷயத்தை, தற்போது நடைமுறைக்கு வர உள்ள, உயர் கல்வி நிறுவனங்களில் 27% இடஒதுக்கீட்டிலும் எடுத்து வருவதற்கு, ஓட்டு அரசியலில் பேர் போன சிறிதும் பெரியதுமான பல அரசியல் கட்சிகள் (கம்யூனிஸ்டுகள் தவிர்த்து!) கடும் எதிர்ப்பு தெரிவித்து வருகின்றன. இடஒதுக்கீட்டை நீர்த்து போக வைக்கும் முயற்சி என்றும் குற்றம் சாட்டுகின்றன ! க்ரீமி லேயர் வரையறுக்கப்படாமல் உயர் கல்வி நிறுவன இடஒதுக்கீடு (2007-இல்) அமலுக்கு வந்து, பின்னாளில் இது தொடர்பாக ஒரு வழக்கு தொடரப்பட்டால், நீதிமன்றத்துக்கும், பாராளுமன்றத்துக்கும் இடையே இன்னொரு பிரச்சினை உருவாக வாய்ப்புள்ளது.

இறுதியாக, இப்போதுள்ள உயர் சாதியினர் / இன்ன பிற பிற்படுத்தப்பட்ட பிரிவினர் ஆகிய இரு தரப்பினரிடமும், தலித்துகளுடன் சமூக வளங்களை / பயன்களை சமமாக பங்கிட்டுக் கொள்வதில் பொதுவாக ஒரு மனத்தடை நிலவுகிறது என்பது உண்மை. தலித் மற்றும் பழங்குடியினரின் அவலமும், அவர்கள் சந்திக்கும் வன்கொடுமைகளும் பல ஆண்டுகளாக தொடர்ந்து கொண்டிருக்க, எல்லாரும் வாய் வார்த்தையாக, நமக்கு அவற்றில் எந்த பொறுப்பும் இல்லை என்ற வகையில் பேசிக் கொண்டிருக்கிறோம் !!! தலித்துகளை பொருத்தவரை, அவர்களுக்கு வழங்கப்பட்டுள்ள இடஒதுக்கீட்டையே அவர்களால் இன்று வரை நியாயமாக அனுபவித்து பயன் பெற முடியவில்லை ! அப்புறம் என்ன SC/ST யில் க்ரீமி லேயர் ??? எந்த விதத்தில் பார்த்தாலும், அவர்களில் க்ரீமி லேயர் என்பதற்கு தகுதியானவர் மிக மிகக் குறைந்த எண்ணிக்கையில் தான் இருப்பர் என்று அறுதியிட்டு கூற இயலும்.

என்றென்றும் அன்புடன்
பாலா

கிராமத்து அரட்டை அரசியல் --- 5

கி.அ.அ.அனானி அனுப்பிய தொடரின் ஐந்தாவது பாகம்:
****************************
"என்னண்ணே....அப்சலை தூக்குல போடக்கூடாது அப்படீன்னு முதலமைச்சர் கூட சொல்லிட்டாரே" மலையாண்டி சொன்னவாரே வந்தான்.

"ஆமாமா...காஷ்மீர் முன்னாள்... இந்நாள் ரெண்டு பேரும் சொல்லியிருக்காங்க...அதுல இன்னாள் முதல்வர் தூக்குல போட்டா கலவரமாயிடும் அப்படீன்னு சொன்னார்...ஆனா முன்னாள் முதல்வரோ ஒரு படி மேல போயி நீதிபதி உயிருக்கு உத்திரவாதமில்லை அப்படீன்னு பகிரங்க மிரட்டலே விட்டுட்டாரு"என்றார்

"அட நா அவுகளைச் சொல்லலைண்ணே...நம்ம முதல்வர் சொல்லியிருக்குறதை சொன்னேன் " என்றான்

"அப்படியா " என்றான் அப்போதுதான் வந்த மணி.

"ஆமா...நேரடியா அப்சலை குறிப்பிட்டு சொல்லலை..ஆனா முரசொலியில கேள்வி பதில் பகுதில " நமக்கு நாமே திட்டத்துல" அவரே அவரை கேள்வி கேட்டுக்கிட்டு பதில் எழுதுவாரே அதில்"மரண தண்டனை பற்றி உங்கள் கருத்தென்ன? " அப்படீங்கற கேள்விக்கு " கடுமையான குற்றமிழைத்தவனுக்கு மரணம் தண்டனைன்னா..அதில் அவன் அனுபவிக்கும் வலி ரொம்ப குறைவாகத்தான் இருக்கும்...அது தவறு செய்தவனை அவனுடைய தவறை நினைத்து வருந்தும் சந்தர்ப்பத்தை அவனுக்கு அளிக்காது செய்துவிடும்..அதனால் மரண தண்டனையை மறு பரிசீலனை செய்ய வேண்டும் "அப்படீன்னு பொருள் படும்படி சொல்லியிருக்காரு "என்றான் மலையாண்டி

"ஆமாமாம்...இதை அவர் இப்ப மட்டும் சொல்லலியே...ராஜிவ் காந்தி கொலை வழக்குல தூக்கு தண்டனை தீர்ப்பானப்பவும் சொன்னாரு" என்றார் மூக்கையண்ணன்

"இப்ப என்னண்ணே ஆகும்..அப்சலை தூக்குல போட்டுருவாங்களா...மாட்டாங்களா? "

"டேய்.... அவனுடைய கருணை மனு ஜனாதிபதி அப்துல் கலாம் கிட்ட போயிருக்கு..அதைப் பார்த்து அவர் என்ன முடிவெடுக்குறாரோ அதுதான்" என்றார் மூக்கையண்ணன்

"அவர் சொந்த முடிவில்லிங்க....அவர் காபினெட் மந்திரி சபைக்கு பரிசீலனைக்கு அனுப்புவாரு..அவங்க என்ன சொல்ராங்களோ அதுதான் ஜனாதிபதி முடிவு அப்படிங்கற பேரில் கருணை மனு ஏற்பு அல்லது தள்ளுபடி அப்படீன்னு வெளியாகும் " என்றான் அங்கு வந்த காலேஜ் படிக்கும் மணிகண்டன்.

"அடேடே..அப்படியா...இது தெரியாம நான் இத்தனை நாளா கருணை மனுவின் மீது ஜனாதிபதி முடிவெடுப்பாருன்னுல்ல நினைச்சுக்கிட்டிருந்தேன்" என்றான் மலையாண்டி.

"இதுல வேடிக்கை என்னன்னா அரசியலமைப்பு சட்டத்துல 72ஆம் பிரிவில் "ஜனாதிபதிக்கு மன்னிக்க முழு அதிகாரம் உள்ளது" அப்படீன்னு இருந்தாலும் மற்ற விஷயங்களைப் போலவே ஜனாதிபதி மந்திரி சபை என்ன முடிவு எடுக்குதோ அதனடிப்படையிலேதான் செயல் படுவார்..."

"அப்ப சட்டு புட்டுன்னு முடிவாயிடும்னு சொல்லு" என்றான் மணி

"அதுதான் இல்லை...இந்த அப்சல் கேசுக்கும் முன்னாலெயே மொத்தம் 20 கருணைமனு முடிவெடுக்கப்படாமல் அப்துல்கலாம் கிட்ட இருக்குதாம்..அதுல ராஜிவ் காந்தி கொலை வழக்குல மரண தண்டனை பெற்ற 3 பேர், 1993-ல் பஞ்சாப் இளைஞர் காங்கிரஸ் தலைவரை கொல்ல பாம் வச்சு 9 பேரை அப்புக்கு அனுப்புன ஆளு, பஞ்சாப்புல முன் விரோதம் காரணமா ஒரே குடும்பத்தை சேர்ந்த 17 பேரை கொன்ன 4 பேர் அப்புறம் நம்ம வீரப்பன் கூட்டாளிங்க 5 பேர் எல்லார் மனுவும் இருக்கு"

"நம்ம சந்தன வீரப்பன் கூட்டாளிங்களா...எதுக்கப்பா" என்றான் மணி

"என்ன சித்தப்பு.... வீரப்பன் உங்க பங்காளி மாதிரி...நம்ம வீரப்பனா...அப்படீன்னு கேக்குறீங்க" என்று கிண்டலடிந்தான் மணிகண்டன்

சிரித்த மூக்கண்ணன் " இவங்க கட்சி போராட்டத்தும் போது இவனும் புகுந்து புறப்பட்டு ரெண்டு மூணு மரத்தை வெட்டிப் போட்டானுல்ல..அதான் மரம் வெட்டுறவனையெல்லாம் பங்காளியா நெனைக்கிறான் போல" என்றார்

"ஆமா..சந்தனவீரப்பன்கூட்டாளிகளேதான்...சைமன், ஞானப்ரகாசம், மீசேகர்,மாதையா, பில்வேந்திரன் அஞ்சு பேருடைய கருணை மனுதான் ...கண்ணி வெடி வச்சு 21 போலிஸ்காரங்களை தூக்குனாங்கல்ல அந்த கேசுல மரண தண்டனை குடுத்தாங்க " என்ற மணிகண்டன்
"இதெல்லாம் இவர் காலத்துதில்லையாம்...இவருக்கு முன்னால இருந்தாருல்ல கே.ஆர்.நாராயணன் அவரு முடிவெடுக்காம விட்டுட்டு போன 12 கேசு..இவர் ஜனாதிபதியானப்புறம் தீர்ப்பான 8 கேசு எல்லாம் சேத்து 20 இருக்கு. கே.ஆர்.நாராயணன் எந்த கருணை மனு மேலையும் முடிவெடுக்காம அப்படியே விட்டுட்டு போயிட்டாரு...அப்துல் கலாம் ஒரே ஒருத்தனை தூக்குக்கு அனுப்பினாரு...போன வருஷம்.... தனஞ்சய் சாட்டர்ஜி அப்படீன்னுட்டு ஒருத்தன் வங்காளத்துல சின்னப் பொண்ணை ரேப் பண்ணி கொன்னுட்டான்..அது மட்டும் மந்திரி சபை பரிந்துரை பேருல கருணை மனு நிராகரிச்சுட்டாரு..அவனை 14-8-2005 ல் தூக்குல போட்டாங்க ...மீதி கேசெல்லாம் அப்படியே இருக்கு "

"அது சரி..அந்த தனஜ்சய் சாட்டர்ஜியை தூக்குல போட்ட போது நம்ம முதல்வர் கருத்து ஏதும் சொன்னாரா? என்றான் மலையாண்டி

"அதுதான் அதுக்கு முந்தியே ராஜிவ் கொலை வழக்கு தீர்ப்பின் போதே மரண தண்டனை தப்பு அப்படீன்னு தெளிவா சொல்லிட்டாரே ...ஒவ்வொரு கேசுக்குமா தனித்தனியா சொல்லுவாரு" என்றார் மூக்கையண்ணன்

"இப்ப மட்டும் திடீர்னு ஏன் கருத்து சொல்ராரு..அண்ணே சந்தனம் கெடைச்சா எடுத்து பூசுவோம்..சாணி கிடைச்சா பூசுவோமா...அதுமாதிரிதான்...தனஞ்சய் சாட்டர்ஜியை தூக்குல போட்டது கூட பாதி பேருக்கு தெரியாது..அதுனால அப்ப கருத்து கிடையாது...ஆனா அப்சலை தூக்குல போடக்கூடாதுன்னு சொன்னாதான மைனாரிடி ஓட்டு கிடைக்கும் அதுனால நேரடியா சொல்லாம தூக்கு தண்டனை தப்பு ...மரண தண்டனை தப்பு... அப்படீன்னு ஸ்டேட்மென்ட் உட வேண்டியது...இதுல "" கடுமையான குற்றமிழைத்தவனுக்கு மரணம் தண்டனைன்னா..அதில் அவன் அனுபவிக்கும் வலி ரொம்ப குறைவாகத்தான் இருக்கும்...அது தவறு செய்தவனை அவனுடைய தவறை நினைத்து வருந்தும் சந்தர்ப்பத்தை அவனுக்கு அளிக்காது செய்துவிடும்."" அப்படீன்னு வியாக்யானம் வேற...வேண்ணா ஒண்ணு பண்ணலாம் ..இனிமே அங்கங்க பாம் வக்கிறவனை கூப்பிட்டுட்டு வந்து மந்திரியாக்கிரலாம்...அவங்களும்...'ஆகா...இவங்கள்ளாம் ரொம்ப நல்லவங்க " அப்படீன்னு வடிவேலு கணக்க சொல்லுவானுங்க' என்றான்" ஆவேசம் வந்தவனாக மலையாண்டி.

அவனை சமாதானப் படுத்தியபடியே கூட்டம் கலைந்தது.
*******************************
### 249 ###

சிந்திப்பதற்கு சில - II

1. நீ இவ்வுலகில் நிகழ்த்த விரும்பும் மாற்றம், நீயாகவே இருத்தல் வேண்டும் !
--- மகாத்மா காந்தி

2. ஒரு தந்தை தன் மகர்க்கு ஆற்ற வல்ல மிக முக்கிய உதவியென்பது, அவர்களின் தாய் மீது அன்பு செலுத்துவதே !
--- தியோடர் ஹெஸ்பர்க்

3. ஒரு கோழை மட்டுமே, தான் அச்சம் என்பதையே அறியாதவன் என்று பெருமை பேசித் திரிவான் !
--- பெர்ட்ராண்ட் ரஸ்ஸல்

4. இறந்த காலத்து வெற்றிகளே, எதிர்காலத்து வெற்றிகளின் பெரும்பகைவனாம்
--- அஸிம் பிரேம்ஜி

5. கடுமையான உழைப்பு பிரார்த்தனைக்கு நிகரானது
--- லால் பகதூர் சாஸ்திரி

6. நாம் செய்ய நினைக்கும் காரியத்தின் மீது நம் அனைத்து எண்ணங்களையும் ஒருங்கிணைத்தல் அவசியம். ஒரு புள்ளியை நோக்கி ஒருங்கிணைக்கப்படாத சூரியக் கதிர்கள் வெப்ப சக்தியாக ஒரு போதும் மாறுவதில்லை !
--- அலெக்ஸாண்டர் கிரஹாம் பெல்

7. நீ முடியும் என்று எண்ணினாலும், முடியாது என்று நினைத்தாலும், இரண்டும் சரியானவையே !
--- ஹென்றி ·போர்ட்

8. உடலுறவு என்பது சமையல் போன்றது, இரண்டிலும் திறமையுடன் செயல்பட வேண்டும் அல்லது ஈடுபடாமல் இருப்பது நலம் !
--- ஹேரியட் வேண் ஹார்ன் (பாலா கமெண்ட்: சூப்பர் தல ;-))

9. மிகவும் அதிருப்தியில் உள்ள உங்கள் வாடிக்கையாளர்களே, உங்கள் கற்றலின் மிகச் சிறந்த ஊற்று !
--- பில் கேட்ஸ்

10. உங்களுக்கு வழங்கப்பட்டுள்ள மிகச் சிறிய அளவிலான 'கிறுக்குத்தனத்தை' நீங்கள் ஒருபோதும் இழக்கக் கூடாது !
--- ராபின் வில்லியம்ஸ் (பொன்மொழி 9-க்கான என் கமெண்ட்டை இதனோடு சம்பந்தப்படுத்தி பார்க்க வேண்டாம் :))

11. எல்லா அரசியல்வாதிகளும் ஒரே மாதிரியானவர்களே ! நதியே இல்லாத இடத்திலும் பாலம் கட்டுவதாக அவர்கள் உறுதியளிப்பார்கள் !
--- நிகிடா குருஷ்சேவ்

12. நகைச்சுவை (காமெடி) என்பது மின்னலை ஒரு குடுவைக்குள் பிடிப்பதற்கு ஒப்பானது !
--- கோல்டி ஹான்

நண்பர்களே, உங்களுக்கு மிகவும் பிடித்த பொன்மொழி ஒன்றை பின்னூட்டத்தில் இடுங்கள் !

என்றென்றும் அன்புடன்
பாலா

கிராமத்து அரட்டை அரசியல் ---4

"சட்டக் கல்லூரியிலெல்லாம் படிக்கிற பசங்க நல்லா பிராக்டிகல் பண்ணுறாங்கப்பா.... நம்ம கல்வித்தரம் நல்லா முன்னேறியிருக்கு " என்றபடி மூக்கையண்ணன் பக்கத்தில் வந்து உட்கார்ந்தான் மலையாண்டி

"என்னது சட்டக் கல்லூரியில ப்ராக்டிகலா? என்னய்யா சொல்லுற ? எதப் பேசுனாலும் புரியாத படிக்கு உங்க கட்சி கொள்கை மாதிரியே பேசுனா என்ன அர்த்தம்..புரியும் படி சொல்லு" என்றான் அருகிலிருந்த மணி

"கொள்கையப் பத்தி...நீங்க பேசுறீங்க...இருக்கட்டும்...இருக்கட்டும் "என்றான் மலையாண்டி

"அட..விஷயத்தை சொல்லுப்பா...கொள்கை விளக்கம் அப்புறம் வச்சுக்கங்க " என்றார் மூக்கையண்ணன்.

"அண்ணே ...போன வாரம் சென்னை பாரிமுனையில் அம்பேத்கர் சட்டக் கல்லூரில முதலாண்டுல சேர்ந்த மாணவர்களை வரவேற்கும் விழா வியாழக்கிழமை ராஜா அண்ணாமலை மன்றத்துல நடந்துச்சாம். அந்த விழாவில் மூன்றாம் ஆண்டு படிக்குற பசங்க சக மாணவிகளை ரவுசு விட்டதுக்காக , நாலாம் ஆண்டு படிக்கிற கணேஷ்பாபு , கிண்டல் செய்த பசங்களை தட்டிக் கேட்டாராம். இதனால, ரெண்டு பார்ட்டிக்கும் கடும் வாக்குவாதம் வந்து டென்சனாயிருச்சாம்.

இதுக்கெடையில, சனிக்கெழமை சாயங்காலம் வகுப்பறைல இருந்த கணேஷ்பாபுவை மூன்றாம் வருசம் படிக்கும் பூபதி உட்பட 39 பேர் கையில் கத்தி, வீச்சரிவாள் உள்ளிட்ட பயங்கர ஆயுதங்களுடன் தாக்கியிருக்காங்க. இதுல, பலத்த காயமடைந்த கணேஷ்பாபுவ கவர்மெண்டு ஆஸ்பத்திரில சேத்துருக்காம் அங்க இருக்குற டாக்டருக்கு படிக்கிறவங்கள்லாம் அவர் ஒடம்புல டிஞ்சர் போட்டு பஞ்சர் ஒட்டி பிராக்டிகல் பண்ணிப் பாக்குறதுக்காக.

இதுக்கு நடுவுல சட்டக் கல்லூரி முதல்வர் ஜெயமணி எஸ்பிளேனடு காவல் நிலையத்தில் புகார் கொடுத்துருக்காரு. இப்புகாரின் பேரில் கல்லூரியில் பயங்கர ஆயுதங்களைக் கொண்டு வன்முறையில் ஈடுபட்ட 39 மாணவர்கள் மீது 147, 148, 448, 324, 506(2) உள்ளிட்ட பிரிவுகள்ள வழக்குப் பதிவு செய்து,மாணவர்களை போலீஸ் தேடிக்கிட்டு இருக்காம்.""

""பாருங்கண்ணே சட்டக்கல்லூரில படிக்கிறப்பவே எவ்வளவு பொறுப்பா பிராக்டிகல் பரிட்சையெல்லாம் செய்யுறாங்க.இப்ப இந்த பசங்களுக்கெல்லாம் 147, 148, 448, 324, 506(2) எல்லா செக்ஸனும் தரோவா ஆயிருமில்லண்ணே...பாருங்க நம்ம பசங்கள்லாம் படிக்கும் போதே என்ன சுறுசுறுப்பா தொழில் கத்துக்குறாங்க"""" என்றான் மலையாண்டி அப்பாவியாக முகத்தை வைத்துக் கொண்டு.

"ம்ம்...நக்கலு...ஏண்டா மூணாம் கிளாசு தாண்டாத நீயி பட்டணத்துல படிக்கிறவன பாத்து நக்கல் வுடுறியா.... நேரம்டா " என்றார் மூக்கையண்னன்.

மூணாம் கிளாசு என்று நக்கலடித்ததில் கடுப்பான மலையாண்டி " ஏண்ணே,,ஒரு வேளை இப்படி இருக்குமோ?? உங்க கட்சில சேர்ந்து கார்ப்பரேசன் சட்டசபை எலெக்சனுலல்லாம் ஓட்டு சேகரிக்க இப்பலேருந்தே அடிப்படை உறுப்பினர் தகுதிய வளத்துக்குறாங்களோ என்னமோ " என்றான்.

"டேய்...யாரச் சொன்ன ...போன கார்ப்பரேசன் எலக்சன்ல அராஜகத்தை ஆரம்பிச்சு வச்சது ஒங்க கட்சி ..அதுக்குத்தான் இப்ப நாங்க கொஞ்சம் பதில் மரியாதை செஞ்சோம்... எங்க தன்மானத் தலைவரே சொல்லிட்டருல்ல..போடா பெருசா பேச வந்துட்டான்" என்றார் மூக்கையண்ணன் .

" அப்ப நாங்க செய்யுறதப் பாத்துதான் காப்பியடிப்பீங்க...உங்களுக்குன்னு சுயமா புத்தி கிடையாதா? " என்றான் மலையாண்டி

"டேய், யாரப்பாத்து புத்தி கிடையாதான்னு கேட்ட " என்று மூக்கையண்ணன் மலையாண்டியை அடிக்க ஓடி வர மணி இடையில் புகுந்து தடுக்கப் போக அந்த இடமே பன்றி நோண்டிப் போட்ட கப்பக்கிழங்கு காடு போல களேபரமானது.

அரசுப்பணியில் இடஒதுக்கீடு குறித்து உச்ச நீதிமன்றம்

**********************************
எஸ்.சி., எஸ்.டி. அரசு ஊழியர்களுக்கு பதவி உயர்வில் இட ஒதுக்கீடு சரியே: உச்ச நீதிமன்ற தீர்ப்பு

அரசு வேலையில் உள்ள தாழ்த்தப்பட்ட, பழங்குடி வகுப்பினருக்கு பதவி உயர்விலும் இட ஒதுக்கீட்டுக் கொள்கையை அமல்படுத்துவது சரியே என்று உச்ச நீதிமன்ற அரசியல் சட்ட பெஞ்ச் தீர்ப்பு வழங்கியது. அதே சமயம் ஒட்டுமொத்த ஒதுக்கீடு மொத்தப் பதவியில் 50%-க்கு மிகாமல் இருக்க வேண்டும், பொருளாதார ரீதியாக வசதியாக இருக்கும் உயர் வருவாய்ப் பிரிவினருக்கு இச் சலுகை தரப்படக்கூடாது என்றும் வலியுறுத்தியது.

தலைமை நீதிபதி ஒய்.கே. சபர்வால், கே.ஜி. பாலகிருஷ்ணன், எஸ்.எச். கபாடியா, சி.கே. தாக்கர், பி.கே. பாலசுப்பிரமணியன் அடங்கிய பெஞ்ச் வியாழக்கிழமை இத் தீர்ப்பை வழங்கியது.

அரசியல் சட்டத்தின் 77, 81, 82, 85-வது திருத்த சட்டங்களை ஆட்சேபித்து மனுக்கள் தாக்கல் செய்யப்பட்டிருந்தன. அரசியல் சட்டத்தின் அடிப்படையையே இத் திருத்தங்கள் மாற்றுவதாகவும், அனைவரும் சமம் என்ற அரசியல் சட்டப் பிரிவுக்கு முரணாக இச்சலுகை இருப்பதாகவும் மனுதாரர்கள் வாதிட்டனர்.

அரசு வேலையில் சேர்ந்த பிறகு ஊழியர்கள் அனைவரும் சமமாக பாவிக்கப்பட வேண்டும், சாதி அடிப்படையில் தாழ்த்தப்பட்ட, பழங்குடி இனத்தைச் சேர்ந்தவர்களுக்கு மட்டும் பதவி உயர்வில் முன்னுரிமை வழங்குவது மற்ற இனத்தைச் சேர்ந்தவர்களுக்கு மனச்சோர்வையும், பணியில் ஈடுபாட்டுக் குறைவையும் ஏற்படுத்தும் என்று மனுதாரர்கள் ஆட்சேபித்தனர்.

இந்த ஆட்சேபங்களை பெஞ்ச் தள்ளுபடி செய்தது. ஆண்டாண்டு காலமாக அழுத்தி வைக்கப்பட்டிருந்தவர்கள் சமூகத்தில் சம அந்தஸ்தைப் பெற, இட ஒதுக்கீடு என்பது சமூக நீதியை வழங்கும் கருவியாக இங்கே பயன்படுத்தப்படுகிறது. குறிப்பிட்ட துறையில் அல்லது பதவியில் இப் பிரிவினரின் பிரதிநிதித்துவம் குறைவாக இருக்கிறது என்று அரசு கருதினால், இப்படிப் பதவி உயர்வின் மூலம் இப் பிரிவினரை நியமித்துக் கொள்ள அரசுக்கு உரிமை இருக்கிறது.

அந்தந்த மாநிலங்களின் நிலைமைக்கு ஏற்ப இதை முடிவு செய்யலாம். அப்படிச் செய்யும்போது யாராவது தங்களுக்கு பாதிப்பு நேரிட்டுவிட்டதாகக் கருதினால் சம்பந்தப்பட்ட நீதிமன்றத்தில் முறையீடு செய்யலாம்.

எந்தக் காரணத்தைக் கொண்டும் ஒட்டுமொத்த இட ஒதுக்கீட்டு அளவு 50%-ஐத் தாண்டக் கூடாது. அதே போல, வசதி வாய்ப்புடன் வாழும் உயர் வருவாய்ப் பிரிவினர் இச் சலுகையை அனுபவிக்க இடம் தரக்கூடாது என்று பெஞ்ச் தீர்ப்பளித்தது. நிர்வாகத் திறனையும் அரசு மனதில் கொண்டு இச் சலுகையை வழங்க வேண்டும் என்றும் பெஞ்ச் ஆலோசனை தெரிவித்தது.
*****************************
நன்றி: தினமணி

பி.கு: மேற்கூறிய வழக்கில், இரண்டு முக்கிய விஷயங்கள் விவாதிக்கப்பட்டன.

1. இடஒதுக்கீடு தொடர்பாக அரசு மேற்கொண்ட அரசியல் சட்ட திருத்தங்கள், திருத்தப்பட்ட அரசியல் சட்டத்தின் அடிப்படைத் தன்மையை கேள்விக்குள்ளாக்குகிறதா என்பது

2.இடஒதுக்கீட்டை செயல்படுத்தும்போது, Article 16-இல் சொல்லப்பட்டுள்ள சமன்பாட்டையும், கடைபிடிக்கப்பட வேண்டியவற்றையும், அரசு தெளிவாக சீர் நோக்கி பார்ப்பதும், பாவிப்பதும் குறித்து

Article 16 Equality of opportunity in matters of public employment

(1) There shall be equality of opportunity for all citizens in matters relating to employment or appointment to any office under the State.

(2) No citizen shall, on grounds only of religion, race, caste, sex, descent, place of birth, residence or any of them, be ineligible for, or discriminated against in respect of, any employment or office under the State.

(3) Nothing in this article shall prevent Parliament from making any law prescribing, in regard to a class or classes of employment or appointment to an office under the Government of, or any local or other authority within, a State or Union territory, any requirement as to residence within that State or Union territory prior to such employment or appointment.

(4) Nothing in this article shall prevent the State from making any provision for the reservation of appointments or posts in favour of any backward class of citizens which, in the opinion of the State, is not adequately represented in the services under the State.

(4A) Nothing in this article shall prevent the State from making any provision for reservation in matters of promotion to any class or classes of posts in the services under the State in favour of the Scheduled Castes and the Scheduled Tribes which, in the opinion of the State, are not adequately represented in the services under the State.

(5) Nothing in this article shall affect the operation of any law which provides that the incumbent of an office in connection with the affairs of any religious or denominational institution or any member of the governing body thereof shall be a person professing a particular religion or belonging to a particular denomination.

உச்ச நீதிமன்றம், முக்கியமாக, இடஒதுக்கீட்டில் 50% உச்சவரம்பு, க்ரீமி லேயர் வரையறுப்பு, தாழ்த்தப்பட்டவர்களையும், பிற பிற்படுத்தப்பட்டவர்களையும் பிரித்து நோக்கல் என்ற மூன்று விஷயங்களும் அவசியம் கடைபிடிக்கப்பட வேண்டியவை என்று தெளிவாகக் கூறியிருக்கிறது. அதே போல், பதவி உயர்வில் இடஒதுக்கீட்டை அமல்படுத்துவதின் தேவையை (Article 335-க்கு உட்பட்டு) மாநில அரசுகளே நிர்ணயம் செய்யலாம் என்றும் கூறியிருக்கிறது.

Article 335 Claims of Scheduled Castes and Scheduled Tribes to services and posts

The claims of the members of the Scheduled Castes and the Scheduled Tribes shall be taken into consideration, consistently with the maintenance of efficiency of administration, in the making of appointments to services and posts in connection with the affairs of the Union or of a State.

க்ரீமி லேயரை SC/STயில் வரையறுப்பது தேவையில்லை என நினைக்கிறேன். இட ஒதுக்கீடு அமல்படுத்தி இத்தனை வருடங்கள் ஆகியும், அவர்களில் பலர் அதன் பலனை முழுமையான அளவில் பெறவில்லை என்றே சொல்ல வேண்டும். இப்பிரிவினரின் பிரநிதித்துவம், பல துறைகளிலும் இன்றும் குறைவாகவே உள்ளது.

அதே நேரத்தில், OBC-யில் க்ரீமி லேயரை வரையறுப்பது நிச்சயம் தேவையானதே ! அல்லது, OBC-யில் இடஒதுக்கீட்டினால் பயனடைந்து முன்னேறியதாக அறியப்படும் சில சாதிகளை விலக்குதல் வேண்டும்.

என்றென்றும் அன்புடன்
பாலா

சில கார்ட்டூன்கள்

கிராமத்து அரட்டை அரசியல் - 3

கி.அ.அ.அனானி மெயிலில் அனுப்பிய 3-வது பாகம் பதிவாக ! என் நேரடி அனுபவம், அரட்டையைத் தொடர்கிறது !!!

*****************************
வழக்கம் போல் மூக்கையண்ணன் பேப்பர் படித்துக் கொண்டு இருந்தார்.வீரம்மாள் பையன் சின்ராசு பள்ளிக்கூட பையுடன் அழுது கொண்டே ஓடி வந்தான்...பின்னாலேயே வீரம்மாள் அவனை அடிக்க கையில் புளியங்கொம்புடன் துரத்திக் கொண்டு வந்தாள்.

""எலே சின்ராசு..நில்லு...ஏண்டா அழுவுற"""

அதற்குள் அவனை பிடித்து விட்ட வீரம்மாள் சுளீர் என்று ஒன்று வைத்தாள்.

சின்ராசை அவளிடம் இருந்து பிரித்து அடி படுவதை தடுத்த மூக்கய்யண்ணன் " ஏ.. வீரம்மா...என்ன..கோட்டி...கீட்டி பிடுச்சுருச்சா..புள்ளையப்போட்டு புளிய விளாரால இந்த அடி அடிக்கிற...அப்படி என்ன செஞ்சான்""

"இதக் கேளுங்கண்ணே..கணக்குல முட்டை வாங்கிட்டு வந்துருக்கான் ... கேட்டா சரியாதான் கணக்கு போட்டேன் அப்படீங்குறான் மூதி...தெனைக்கும் வாத்தி என்னைக் கூப்பிட்டு திட்டுது "

" அப்படி என்ன தப்பா போட்ட "

"786 + 734 எவ்வளவுன்னு கேட்டாங்க...நானு கூட்டி கரெக்டா 1672-ன்னு சொன்னேன் அதுக்கு வாத்தியார் தப்புன்னு சொல்லி முட்டை போட்டுட்டார் " என்றான் சின்ராசு.

கூட்டிப் பார்த்த மூக்கய்யண்ணன் " எலே 786 + 734 =1520 ல்ல வரும்...1672 எப்படிலெ வரும் ? சரியா படி" என்றார்

"இல்லை மாமா...1672 தான் சரி... அதிகாரிகள் சொன்னாங்கன்னுட்டு பேப்பர்ல கூட போட்டிருந்தாங்களே " என்றான்

"என்னாது...சரியா...அதுவும் அதிகாரிகள் சொன்னாங்களா? என்னடா சொல்ற ?"

"மாமா..மாநகராட்சி தேர்தல்ல சென்னை துறைமுகம் தொகுதி 23 ஆம் வார்டுல 394 ஆம் நம்பர் பூத்துல மொத்தம் 786 ஆண் மற்றும் 734 பெண் வாக்காளர்களாம்...தேர்தல் முடிஞ்சப்புறம் மொத்தம் 1672 வாக்குகள் பதிவாகியிருந்ததாம்...அதிகாரிகள் கூட்டி கழிச்சு பாத்து வெற்றிகரமா நூத்துக்கு நூத்துபத்து சதவிகிதம் வாக்கு பதிவாகியிருக்கு அப்படீன்னு அறிவிச்சாங்களாம். அப்புறம் ஞானோதயம் வந்து அடடா.....என்னதான் எல்லாரும் ஓட்டு போட்டாலும் நூறு சதவிகிதத்துக்கு மேல வாக்கு பதிவாகக்கூடாதேன்னு கண்டு புடிச்சு அந்த பூத்துல மறு வாக்கு பதிவு பண்ணி அப்ப எவ்வளவு ஓட்டு பதிவாகுதுன்னு பார்க்கலாம் அப்படீன்னு புது ஓட்டு பெட்டிய வச்சுகிட்டு குத்த வச்சு உக்காந்துருக்காங்களாம்..இன்னும் படிச்ச அதிகாரிகளுக்கே இந்தக் கனக்குக்கு சரியா விடை தெரியலை..அதுக்குள்ள எங்க வாத்தியார் கணக்கு தப்புன்னுட்டார்...எங்க ஆத்தா அடிக்க வருது...நீங்க வேற பஞ்சாயத்து பண்ண வந்துட்டீங்க..போனீங்களா " என்று சொல்லிவிட்டு நடையைக் கட்டினான்.

அவன் பதிலைக் கேட்டு மூக்கையண்ணன் முகம் போன போக்கைப் பார்த்து அங்கிருந்த அனைவரும் சிரிக்க அந்த இடம் வடிவேலு படம் ஓடும் சினிமா கொட்டகை போல மாறியது.

*************************

கி.அ.அ.அனானி பேசியிருப்பது ஓரிடத்தில் நடந்த கேலிகூத்தைப் பற்றி தான். எனக்கு நேரடி அனுபவம் ஏற்பட்டது. வெள்ளியன்று காலை பத்து மணியளவில் வாக்குச்சாவடிக்கு சென்றிருந்தேன். அலுவலர்கள், காவலர் தவிர யாருமில்லை. 'சட்டமன்ற தேர்தலில் இம்மாதிரி இல்லையே, இதென்ன விநோதமாக இருக்கிறதே' என்று எண்ணியபடி நுழைந்தால், ஒரு அலுவலர் ஒன்றும் விசாரிக்காமல், ஒரு வாக்குச்சீட்டைக் கொடுத்து, முத்திரையிட்டு வாக்குப்பெட்டியில் போடுமாறு கூறினார் !!!

"என்னங்க, என் பேரை வாக்காளர் லிஸ்டில் சரி பார்க்கவில்லை, வாக்குச்சீட்டின் counterfoilஇல் கையெழுத்தும் வாங்கவில்லை, கையில் மை வைக்க குச்சியும் காணவில்லை !!! உங்கள் Returning officer எங்கே ?" என்று கேட்டதற்கு, அவர் டீ சாப்பிடப் போயிருப்பதாகக் கூறினர். ஒப்புக்காக, எதையோ செய்து வாக்களிக்க விட்டனர். அங்கிருந்த ஒருவர், வாக்குப்பெட்டிகள் ஏற்கனவே போய் விட்டதால், நீங்கள் அளித்த வாக்கு வேஸ்ட் என்றார் !!! "என்னங்க, இப்டி சொல்றீங்க?" என்றதற்கு, "சார், எங்களுக்கும் பிள்ளைக் குட்டி இருக்குல்ல" என்றவுடன், வெளியில் இருந்த போலிஸ் அதிகாரியிடம் சென்று, "என்ன சார், இது ? ஒரே கூத்தா இருக்கு" என்றேன். அவர் "ஒன்றும் சொல்வதற்கில்லை, ஏதோ வோட்டு போட விட்டார்கள் இல்லையா, போய் ஒங்க வேலையைப் பாருங்கள்" என்றார். அவருக்கு என் நன்றியை தெரிவித்தேன் !!! வெளியே இருந்த சிலர் என்னைப் பார்த்து நமுட்டுச் சிரிப்பை உதிர்த்தது ஏன் என்று விளங்கவில்லை ;-)

எது எப்படியிருந்தாலும், வாக்குச் சாவடிக்கு தைரியமாகச் சென்று என் ஜனநாயகக் கடமையைச் செய்ததிலும், என் ரேஷன் கார்டைக் காப்பாற்றிக் கொண்டதிலும் (மருத்துவர் ஐயா, தேர்தலில் வாக்கு போடாதவர்களின் ரேஷன் அட்டைகளை அரசு திரும்பப் பெற வேண்டும் என்று ஒரு பேட்டியில் கூறியிருந்தார் :)) எனக்கு பரம திருப்தி. அந்த திருப்தியோடு, மாதாந்திர 'புவா'வுக்கு வழி செய்யும் உருப்படியான வேலையைத் தொடர அலுவகலம் சென்றேன் !!! போகும் வழியில், பாஜக வேட்பாளர், ஒரு ஐந்து பேரோடு மெயின் ரோட்டின் நடுவில் நின்றபடி, பரிதாபமாக "ஜனநாயகப் படுகொலை ஒழிக" என்று கோஷம் போட்டுக் கொண்டிருந்தது கண்ணில் பட்டது. இன்னும் சற்று தொலைவில், டாடா சுமோக்கள் அழகாக அணி வகுத்துச் சென்றதையும் பார்த்தேன் !!!

என்றென்றும் அன்புடன்
பாலா

தீவிரவாதம் பலி கொண்ட வீரத் தமிழன்

நேற்று செய்தியில் வாசித்தது:

தமிழ்நாடு அனகாபுத்தூரைச் சேர்ந்த பார்த்திபன் என்ற 23 வயது நிரம்பிய இந்திய ராணுவ லெப்டினன்ட் கடந்த சனிக்கிழமையன்று, காஷ்மீரத்தில் எல்லைக் கட்டுப்பாடு கோட்டருகே (LoC) தீவிரவாதிகளுடன் நடந்த துப்பாக்கிச் சண்டையில் வீர மரணம் அடைந்தார். அவர் உயிர் துறப்பதற்கு முன் 5 தீவிரவாதிகளை சுட்டு வீழ்த்தியிருக்கிறார் !

FROM THE ALBUM: Lt. N. Parthiban with his parents, Tamil Selvi and Major V. Natarajan (retired), during the pipping ceremony at the Officers Training Academy in March.

அவரது உடல் சென்னைக்கு எடுத்து வரப்பட்டு, மலர்களால் அலங்கரிக்கப்பட்ட ராணுவ ஊர்தியில் ஊர்வலமாக எடுத்துச் செல்லப்பட்டு, முழு ராணுவ மரியாதையுடன் தகனம் செய்யப்பட்டது. அவரது இறுதி யாத்திரையில் ராணுவ அதிகாரிகளும், நண்பர்களும், ஏராளமான பொதுமக்களும் கலந்து கொண்டு அஞ்சலி செலுத்தினர். அவருடன் பணியாற்றிய ராணுவ நண்பர்களும், அவரது குடும்பத்தினரும் மிகவும் கஷ்டப்பட்டு தங்கள் உணர்வுகளை கட்டுப்படுத்திக் கொண்டு நின்றது, திரண்டிருந்த மக்களின் கண்களில் நீரை வரவழைத்தது.

பார்த்திபன், சென்னையிலுள்ள Officers Training Academy (OTA) யிலிருந்து பட்டம் பெற்றவர். ஜம்மு காஷ்மீரில் 5 JAK LI (Light Infantry) ரெஜிமெண்டில் சேவை புரிந்தவர். அவரது தந்தையார் நடராஜன் இந்திய ராணுவத்தில் மேஜராகப் பணியாற்றி ஓய்வு பெற்றவர். பார்த்திபனின் தாயார் தமிழ்ச்செல்வி. அவருக்கு புஷ்பா, கார்த்திகா என்ற இரு சகோதிரிகள் உள்ளனர்.

இறப்பதற்கு ஒரு நாள் முன்பு, தான் ஈடுபட இருக்கும் ஆபத்தான வேலை குறித்து தன் குடும்பத்தினரிடமும், நண்பர்களிடமும் பேசியிருக்கிறார். தான் அதிலிருந்து மீண்டு வருவது பெரிய சவாலாக இருக்கும் என்று கூறியிருக்கிறார் !

தீவிரவாதத்திற்கு, இன்னும் இது போல எத்தனை வீர இளைஞர்களை பலி கொடுக்கப் போகிறோமோ என்பதை எண்ணிப் பார்க்கையில் நெஞ்சு கனக்கிறது !


சுட்டிகள்:

ஒன்று

இரண்டு

என்றென்றும் அன்புடன்
பாலா

*** 243 ***

படிச்சுட்டு முடிஞ்சா சிரிங்க - 9வது பதிவு

மெயிலில் வந்த ஆங்கில மேட்டரை மொழி பெயர்த்திருக்கிறேன். என்சாய் !

தந்தைக்கு ஓர் மடல் !
****************
ஒரு தந்தை தன் டீன்ஏஜ் மகளின் அறைப்பக்கம் சென்றபோது, அறை மிக சுத்தமாகவும், பொருட்கள் இருக்க
வேண்டிய இடத்தில் இருப்பதையும் பார்த்து மிகவும் ஆச்சரியமடைந்து, அறையில் நுழைந்தவர், படுக்கையில்
தலையணையின் மேல் "என் அன்புள்ள அப்பாவுக்கு" என்று எழுதியிருந்த ஒரு கடிதத்தை கண்டு துணுக்குற்று,
'ஏதோ நடக்கக் கூடாதது நடந்து விட்டது' என்ற பயத்தில் கடிதத்தைப் பிரித்துப் படிக்கத்
தொடங்கினார்.

என் அன்புள்ள அப்பா,

மிகுந்த மன வருத்தத்துடன், இதை எழுதுகிறேன். நான் வீட்டை விட்டுப் போகிறேன். இப்படி
சொல்லாமல் கொள்ளாமல், என் புதிய காதலன் கமலேஷ¤டன் நான் ஓடிப் போவதற்குக் காரணம், உங்களுடனும்,
அம்மாவுடனும் ஓர் அனாவசிய சண்டையைத் தவிர்க்கவே. கமலேஷ் என் மேல் மிகுந்த ஆசை வைத்துள்ளார்.
எனக்கும் அவர் மேல் கொள்ளை ஆசை ! கமலேஷ் உடலெங்கும் துளையிட்டு ஆபரணங்கள் அணிந்தும், பச்சை
குத்தியும், மோட்டார் சைக்கிள் ஓட்டுபவர் போல் உடை அணிந்தும் காணப்பட்டாலும் நீங்கள் அவரைச்
சந்தித்தால், நிச்சயம் அவரை விரும்புவீர்கள் !!!

இன்னொரு விஷயமும் சொல்ல வேண்டும், நான் கர்ப்பமாக இருக்கிறேன். கமலேஷ், நான் குழந்தை
பெற்றுக் கொள்வதையும், நாங்கள் சேர்ந்து சந்தோஷமாய் வாழ்வதையும் மிகவும் எதிர்பார்க்கிறார்.
கமலேஷ¤க்கும் எனக்கும் அதிக வயது வித்தியாசம் (45 எல்லாம் இக்காலத்தில் ஒரு வயதா என்ன ?)
இருந்தாலும், அவர் ஏழையாக இருந்தாலும், எனக்குக் கவலையில்லை. தூய காதலுக்கு நடுவில் இவையெல்லாம் துச்சம்
என்பது என் எண்ணம். நீங்களும் ஒத்துக் கொள்கிறீர்கள் தானே ???

கமலேஷிடம் பல நல்ல இசை ஆல்பங்கள் உள்ளன. காட்டின் நடுவே, தனிமையான சூழலில், ஒரு அழகான
இடத்தில் அவர் வாழ்கிறார். கமலேஷ¤க்கு என்னைத் தவிர இன்னும் சில பெண்களுடன் தொடர்பு
இருந்தாலும், அது குறித்து எனக்குக் கவலையில்லை. அவருக்குத் தெரிந்த விதத்தில், அவர் என்னிடம்
விசுவாசமாக இருப்பார் என்ற நம்பிக்கை எனக்குள்ளது ! நான் நிறைய குழந்தைகள் அவருக்கு பெற்றுத் தர வேண்டும்
என்பது அவர் ஆசை, என் கனவும் அதுவே.

மரிஜுவானா எவ்வளவு அற்புதமான விஷயம் என்பதை எனக்கு கற்றுத் தந்தவர் கமலேஷ் தான். கஞ்சா
வழங்கும் பேருவகையை எனக்கு அறிமுகம் செய்தவரும் அவரே ! நாங்கள் தினமும் பிரார்த்தனை செய்வோம்,
எய்ட்ஸை குணப்படுத்த மருந்து சீக்கிரம் கண்டு பிடிக்கப்பட வேண்டும் என்று, அது நடந்தால், கமலேஷின்
உடல் நலமும் கொஞ்சம் கொஞ்சமாக தேறும் அல்லவா ???

என்னைப் பற்றி கவலைப்பட்டு உங்கள் உடல்நலத்தை கெடுத்துக் கொள்ள வேண்டாம். எனக்கு இப்போது 15
வயது, நல்லது கெட்டதும், என்னை கவனித்துக் கொள்ளவும், எனக்குத் தெரியும் !!! ஒரு நாள் நாங்கள்
உங்களை சந்திக்க திரும்பி வருவோம், உங்கள் பேரக் குழந்தைகளைப் பார்க்க உங்களுக்கு மட்டும் ஆசை
இருக்காதா என்ன ?

உங்கள் அன்பு மகள்,
அனிதா
**********************************

கடிதத்தில் முடிவில், 'மறுபக்கம் பார்க்கவும்" என்று எழுதியிருந்ததைப் பார்த்த தந்தையார், இன்னும்
என்ன குண்டை தலையில் போடப் போகிறாளோ என்ற அதிர்ச்சியில், கைகள் நடுங்க, கடிதத்தைத்
திருப்பி வாசித்தார்.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
பின் குறிப்பு: நான் மேலே எழுதிய எதுவும் உண்மையில்லை ! நான் பக்கத்து வீட்டில் இருக்கிறேன்.
என் மேசையின் நடு டிராயரில் இருக்கும் என் ரிப்போர்ட் கார்ட் மதிப்பெண்களை விடவும்,
வாழ்க்கையில் பல மோசமான விஷயங்கள் உள்ளன என்பதை உங்களுக்கு ஞாபகப்படுத்த விரும்பினேன். கார்டில்
கையெழுத்திட்டு விட்டு, நான் நம் வீட்டுக்கு வர எது பாதுகாப்பான சமயம் என்பதை தொலைபேசவும் ! ஐ
லவ் யூ, அப்பா :)

என்றென்றும் அன்புடன்
பாலா

*** 242 ***

Captain விக்ரம் பத்ரா - ஒரு வீர சகாப்தம்

இந்த மீள்பதிவு பரம்வீர் சக்ர விருது பெற்ற கேப்டன் விக்ரமுக்கு ஓர் அஞ்சலி !


அந்த 1999 ஜூன் மாதம் 19-வது இரவு விக்ரம் பத்ராவுக்கு மட்டுமல்ல, அனைத்து இந்தியருக்கும் மறக்க முடியாத தினமாக அமைந்தது! அந்த குளிர் இரவில், கார்கில் போர் தொடங்கி 5 வாரங்கள் ஆன சூழலில், டிராஸ் செக்டாரில் உள்ள சிகரம் 5140 என்ற மலைப்பகுதி, பாகிஸ்தானியரிடமிருந்து விக்ரம் தலைமை தாங்கிய 13 J&K ரை·பில்ஸ் என்ற இந்திய படைப் பிரிவால், வெற்றிகரமாக மீட்கப்பட்டது. மலை யுத்த களத்தில் கிடைத்த ஓர் உன்னதமான வெற்றி அது!

இந்த கடினமான யுத்தத்தில் இந்தியத்தரப்பில் உயிரிழப்பு எதுவும் இல்லை என்பது ஆச்சரியத்தைத் தரும் செய்தி! இதற்கு முக்கியக் காரணம், பலம்பூர், ஹிமாசலத்தைச் சேர்ந்த விக்ரமின் மனதில் ஆழப் பதிந்திருந்த, இந்திய ராணுவப்பயிற்சி மையத்தில் முன்னிறுத்தப்படும்
"உன் தாய்த் திருநாட்டின் பாதுகாப்பும், மானமும், நலனும் எப்போதும் முதலில் பேணப்பட வேண்டும். அடுத்து, நீ வழி நடத்தும் படையினரின் மரியாதையும், நலனும், சுகமும் பேணப்பட வேண்டும். உன் நலனும், சுயபாதுகாப்பும் எப்போதும் இறுதியாகவே பேணப்பட வேண்டும்!"
என்ற அற்புதமான வாசகமே என்றால் அது மிகையாகாது. இந்த வெற்றியே, புலிக்குன்று (Tiger Hill) வீழ்வதற்கும், இந்தியா கார்கில் போரில் வெல்வதற்கும் முன்னோடியாய் அமைந்தது.

அடுத்து, 24 வயது நிரம்பிய விக்ரமின் கையில், சிகரம் 4875-ஐ பகைவரிடமிருந்து மீட்கும் பணி தரப்பட்டது. அச்சிகரம் 16000 அடி உயரத்தில், ஏறுவதற்கு மிகுந்த சிரமம் தரவல்ல, சற்றே செங்குத்தான அமைப்புடையது. மலையைச் சூழ்ந்திருந்த பனி மூட்டமும், இருட்டும், சற்று உடல் நலன் சரியில்லாத நிலையில் இருந்த விக்ரமுக்கும், அவனுடைய சகாக்களுக்கும் பெரும் சவாலாக அமைந்தன. ஷெர்ஷா என்ற சங்கேதப் பெயர் கொண்ட விக்ரமின் வருகையை அறிந்து கொண்ட பாகிஸ்தானியர் ஆக்ரோஷ எதிர்த் தாக்குதலில் இறங்கினர். விக்ரமும், அனுஜ் நய்யார் என்ற அவரது நம்பிக்கைக்குரிய மற்றொரு இளம் வீரரும், பகைவரின் தாக்குதலை முன்னின்று எதிர்கொண்டு, தங்கள் சக வீரர்களை ஊக்குவித்து, பகைவரின் பதுங்குக் குழிகளை அழித்து பாகிஸ்தானியரை பின் வாங்க வைத்தனர். வெற்றி மிக அருகில் இருந்தது!

எதிரியின் குண்டு வெடிப்பில் கால்களில் காயமுற்ற தனது சகா ஒருவரை மீட்டெடுத்து வர, விக்ரம் பதுங்குக் குழியை விட்டு வெளியேறியபோது, அவருடன் இருந்த சுபேதார், தனக்குக் கட்டளை இடுமாறு மன்றாடியும், விக்ரம், "உனக்குப் பிள்ளைகள் இருக்கிறார்கள். எனக்கு வழி விட்டு விலகி நில்!" என்று கூறிவிட்டு ஓடியபோது, பகைவன் ஒருவனின் துப்பாக்கி ரவை விக்ரமின் மார்பை துளைத்தது.


யுத்த களத்தில் வீர மரணம் எய்திய விக்ரம் வெளிப்படுத்திய வீரத்திற்கும், மனத்திண்மைக்கும், மிகச் சிறந்த தலைமைப் பண்புக்கும் அவருக்கு, பின்னாளில் பரம்வீர் சக்ர விருது வழங்கப்பட்டது. அவரது சகா அனுஜ் நய்யாரும் அந்த யுத்தத்தின் முடிவில் வீர மரணம் அடைந்தார். அவருக்கு மஹாவீர் சக்ர விருது வழங்கப்பட்டது.

இளம் வயதிலேயே பேரும் புகழும் (வீர மரணமும்) அடைந்த விக்ரம், அனுஜ் போன்றவர்கள் தங்கள் பணியை தேசியக் கடமையாகவும், வரமாகவும் எண்ணுவதால் தான், நம்மைப் போன்றோர் பயமின்றி, சுகமாக பதிவெழுத முடிகிறது !!! விக்ரமின் தாயார் ஒரு IAS நுழைவுத் தேர்வில் கேட்கப்பட்ட "கேப்டன் விக்ரம் பத்ரா கார்கில் போரில் கைப்பற்றிய சிகரங்கள் யாவை ?" என்று கேட்கப்பட்டதை நினைவு கூர்ந்து, "தாய்நாட்டை அனைத்திற்கும் முன்னால் வைத்த ஒரு தவப்புதல்வனைப் பெற்றது எங்களுக்குக் கிட்டிய ஓர் அரிய பாக்கியம்!" என்று தன் பெரும் சோகத்திலும் பெருமிதம் கொள்கிறார்!

கார்கில் போரின்போது ராணுவத் தலைவராக இருந்த ஜெனரல் மாலிக், விக்ரமைப் பற்றி "இந்தப் பையன் கார்கில் போரிலிருந்து உயிரோடு மீண்டிருந்தால், சரியாக 15 வருடங்களில் என் பதவியை வகிக்க வேண்டியவன்!" என்று கூறியதை பார்க்கும்போது, விக்ரம் என்ற மாவீரனின், ஒரு தலைவனின் இழப்பின் தாக்கத்தை புரிந்து கொள்ள இயலும்!


விக்ரம் பத்ராவின் சிலை பலாம்பூரின் முக்கிய சந்திப்பை அலங்கரித்துக் கொண்டிருக்கிறது. அதற்கு நேர் எதிரே மற்றொரு சிப்பாயின் - மேஜர் சோம்நாத் ஷர்மாவின் -- இந்தியாவின் முதல் பரம்வீர் சக்ர விருதை வென்றவரின் - சிலை காணப்படுகிறது. பலாம்பூரைச் சேர்ந்த அவர், 1947-இல் ஸ்ரீநகர் விமான நிலையத்திலிருந்து பாகிஸ்தான் அனுப்பிய கைக்கூலிகளை சிதற அடித்து முடிவில் வீர மரணம் எய்தியவர். அவ்விடத்தை பங்கிட்டுக் கொள்ள விக்ரமை விட ஓர் உன்னதமான ஆத்மா அவருக்கு கிடைத்திருக்க வாய்ப்பில்லை !!!

*168*

கிராமத்து அரட்டை அரசியல் - 2

நண்பர் (கிராமத்து அரசியல் அரட்டை) கி.அ.அ.அனானி, என் மேல் கோபமாக உள்ளார் என்ற விஷயம் இன்று மெயில் மூலம் தெரிய வந்தது ! அவர் எனக்கு 4-5 நாட்களுக்கு முன் அனுப்பிய மேட்டரை நான் பதிப்பிக்காமல் விட்டதால், அவருக்கு கிடைக்க இருந்த "15 நிமிடப் புகழ்" என்னால் பறி போய் விட்டதாம் ;-)

மேட்டர் என்னவென்றால், அனானி அப்போதே, அ·ப்சலை பகத்சிங் ரேஞ்சுக்கு உயர்த்தி யாராவது பேசக் கூடும் என்ற தீர்க்கதரிசனப் பார்வையை , அவர் எனக்கு அனுப்பிய கிராமத்து அரசியல் அரட்டை மேட்டரில் முன் வைத்திருந்தாராம் !!! அவர் அனுப்பிய பழைய மின்மடலை திறந்து பார்த்தவுடன் விளங்கியது, அனானி அவர்கள் கூறியது 100% சரியென்று ! அவர் கோபமும் நியாயமானது என்பதும் தான் ! அனானி நண்பரை, நான் அறியாமல் செய்த தவறுக்காக ஒரு 'பொது மன்னிப்பு' வழங்குமாறு கேட்டுக் கொள்கிறேன் :)

சரி, ஆனது ஆகி விட்டது ! அவர் அனுப்பிய மேட்டர், பதிவாக உங்கள் பார்வைக்கு. என்சாய் :)))

*******************************
"என்னண்ணே...இன்னிக்கு என்னா விசேஷம் " என்றபடி வந்தான் மாயாண்டி

"ஸ்பெசல்லா பீஹாருல கயிறு தயாராகப் போகுதாமேடா " என்றார் மூக்கையன்

'எதுக்குன்ணே..கயிறு..கெணத்துல தண்ணியெறைக்கவா "

"இல்லைடா...பாராளுமன்றத்துல துப்பாக்கி சூடு நடத்த திட்டம் தீட்டினானே, முகமது அப்ஸல் அவனைத் தூக்குல போடச்சொல்லி தீர்ப்பாயிருக்குல்ல...அதுக்குதான் கயிறு"

"போட்ருவாங்களாண்ணே...காஷ்மீர்ல ஒரே கலாட்டாவா இருக்கே....முதலமைச்சர் குலாம் நபி ஆசாத்தும் கூட அவனைத் தூக்குல போட்டா பெரும் பிரிவினை வாதப் போராட்டம் நடக்கும் அப்படீன்னு அச்சம் தெரிவிச்சுருக்காரே"

"அச்சப்பட்றவனெல்லாம் எதுக்கு ஆட்சீல இருக்கணும் அப்படீன்னு ஒரு படத்துல வசனம் வருமே அதுதாண்டா ஞாபகம் வருது...அவரு அச்சப்படலடா...அச்சப்படுர மாதிரி அவரு ஆசைய சொல்லியிருக்குறாரு"

"பகத்சிங் கூட ஆங்கில பாராளுமன்றத்துல வெடிகுண்டு வீசுனதுக்கு தான தூக்குல போட்டாங்க..அப்ப கூட ரொம்ப கலவரம் நடந்துரும்னுட்டு யாருக்கும் தெரியாம கமுக்கமா தூக்குல போட்டுருவாங்கன்னு சினிமாவுல காட்டுனாங்களே அந்த மாதிரி போட வேண்டியதுதானே"

"டேய் வெறும்பயலே...விட்டா தீவிரவாதி அப்சலை தேசத் தியாகி பகத் சிங் ரேஞ்சுக்கு ஒசத்திருவ போல இருக்கேடா...இந்த நாயெல்லாம் நடுத்தெருல வச்சுதான் தூக்குல போடணும்" என்றார் கோபமாக.

அப்போதுதான் அங்கு வந்த மணி " இதுல சோகம் என்ன தெரியுமா...தூக்கு தண்டனைய ரத்து செய்யக் கோரி பெண்கள் நடத்துன கண்டன ஆர்ப்பாட்டத்துல ரெண்டு போஸ்டர் பார்த்தம்பா..அதுல ஒண்ணைப் பாத்துதான் ரொம்ப நொந்து போயிட்டேன்"

"அப்படி என்னப்பா எழுதியிருந்தது"

ஒண்ணுல " இந்திய நீதித்துறை ஒரு தலைப் பட்சமா இருக்கு" அப்படீன்னு எழுதியிருந்தது..அதுகூட பரவாயில்லை.... எங்க ஆளுங்களே சில பேரு சொல்ரதுதான்....ஆனா இன்னொண்ணுல " சகோதரர் அப்ஸல்...(நீ செய்த காரியத்தை பார்த்து) உன் சகோதரிகள் பெருமைப்படுகிறோம் " அப்படீன்னு எழுதியிருந்தது.இப்படி பெருமைப்பட்டுக்கிட்டு இருக்குறதெல்லாம் இந்தியாவுக்கு எதிரா சதி செய்யாம வேற என்ன செய்யும்..அதுதாண்ணே கொடுமை...அப்புறம் நாடு எங்கருந்து அமைதிப் பூங்காவா மாறும்"

" பன்னாடைங்க அப்படியா கோசம் போட்டாங்க " என்று வெறி வந்தவராக ஆடிய மூக்கைய்யண்ணனால் அமைதிப் பூங்காவாக இருந்த அந்த இடமே யாரோ தீவிரவாதி பாம் போட்டது போல் களேபரமாக மாறியது.
************************

*** 241 ***

அ·ப்சல் மரண தண்டனை --- சில எண்ணங்கள்

தீவிரவாதத்திற்கு துணை போனதாக அ·ப்சலுக்கு மரண தண்டனை வழங்கியது சரியா தவறா என்று தனிப்பட்ட அளவில் கருத்து எதுவும் கூற வரவில்லை. இதன் பின்னணி பற்றி ஓரளவு தெரியும் என்பது தவிர, முழுமையாக படித்துத் தெளியாததும் இதற்கு ஒரு காரணம். சட்டம் தன் பணியை செய்து ஒரு தண்டனை வழங்கியுள்ளது, அவ்வளவே !

இந்த மரண தண்டனை குறித்து, பொதுவாக பல கருத்துக்கள் நிலவுகின்றன.

1. இஸ்லாமியர் (தண்டனைக்கு) ஆதரவாகப் பேசினால், அவர் கட்டாயத்தின் பேரில் சொல்கிறார் என்று அவர் நேர்மையை சந்தேகிப்பது ! சட்டம் தன் கடமையை செய்தது என்ற வகையில், வாய் மூடி இருந்தால், அவர் பாகிஸ்தானிய ஆதரவாளர், தேசப்பற்று இல்லாதவர் என்று குற்றம் சாட்டுவது !

2. இஸ்லாமியர் அல்லாதோர், ஆதரவாகப் பேசினால், அவர்களை (எல்லாரையும் அல்ல) ஆர்.எஸ்.எஸ் / இந்துத்வா என்று முத்திரை குத்துவது !

3. மிதவாதிகளையும், பேசாமல் இருப்பவர்களையும் கூட, "பொதுப்புத்தி" உடையவர்கள் என்று அறிவுஜீவிகள் நிராகரிப்பது ! சட்டம் தன் கடமையைச் செய்யட்டும் என்று ஜனநாயகத்தில் சொல்வது, நிச்சயம் "பொதுப்புத்தி" கிடையாது !

4. தண்டனைக்கு எதிரானவர்களை, சமூகம் உய்வு பெற போராடும் "மாற்றுச் சிந்தனையாளர்கள்" என்று ஓவராகச் சிலாகிப்பது !

என்று (எல்லா ஊடகங்களையும் சேர்த்து) நிறையவே கூறலாம்.

நமது ஊடகங்கள், எப்போதும் போல பிரச்சினையை ஊதிப் பெரிதாக்கி அடிக்கும் லூட்டியின் விளைவாக, (ஜனநாயக உரிமை என்ற பெயரில்) இப்போது அரங்கேறும் அனைத்து கூத்துகளையும் தேசிய அளவிலான அவமானம் என்று தான் கூற வேண்டும். அ·ப்சலின் தண்டனைக்கு எதிராக, காஷ்மீரத்துப் பெண்டிர், "Brother Afsal, We are proud of you" என்று பேனர் கட்டி ஊர்வலம் நடத்துவது மற்றும் "பாராளுமன்றத்தைத் தாக்கியது தேசத் துரோகத்தின் உச்சம்" என்று கூக்குரலிடுவது என்று இரு தீவிர நிலைப்பாடுகளையும், அவற்றின் நடுவே பலவிதமான நிலைப்பாடுகளையும் நாம் பார்க்கிறோம்.

அ·ப்சல், ஜனநாயகத்தின் கோயிலான பாராளுமன்றத்தையே சிதறடிக்க திட்டம் தீட்டியது தேசத் துரோகம், அதனால் அவருக்கு மரண தண்டனை சரியானது என்று வாதிடுவது என் நோக்கமல்ல ! மந்திரிகளையும், பாராளுமன்ற உறுப்பினர்களையும் காக்க வேண்டி (அவர்களில் பாதிக்கு மேல் காப்பாற்ற லாயக்கற்றவராக இருப்பினும்!) போரிட்டு உயிர் துறந்த பாதுகாப்புப் படைவீரர்களின் தியாகம், இது குறித்து பேசும் அனைவரும் எண்ணிப் பார்க்க வேண்டிய ஒன்று. மேலும், திட்டம் தீட்டி சாதாரண பொதுமக்களை குண்டு வைத்துச் சிதறடிப்பது, 'தேசத் துரோகம்' என்ற வரையறைக்குள் வருமா, வராதா ??? அதற்கு மரண தண்டனை வழங்கலாமா, கூடாதா ??? என்ற கேள்விகள் எழுகின்றன. என்னளவில், தீவிரவாதத்தினால், அப்பாவி பொதுமக்களும், (in the line of duty) பாதுகாவலர்களும் உயிரிழப்பது, பாராளுமன்றத் தாக்குதலை விடவும் மிகப்பெரிய விஷயமாகத் தோன்றுகிறது.

அடுத்து, அ·ப்சல் செய்த குற்றத்தின் தீவிரத்தை தள்ளி வைத்து விட்டு, அவருக்கு மரண தண்டனை வழங்கப்பட்டதற்கு ஆதரவு தெரிவிப்பதை "பொதுப்புத்தி" என்று நிராகரிப்பது பற்றிப் பார்ப்போம். ஒரு குற்றத்திற்கு என்ன தண்டனை என்பது, அது நிகழ்ந்த சூழல், விசாரணையின் வாயிலாக சட்டத்தின் முன் நிறுத்தப்பட்டவை, அது போன்ற குற்றங்களைத் தடுக்க deterrent ஆக தீர்ப்பு இருக்க வேண்டிய அவசியம், என்று பல விஷயங்களைச் சார்ந்தது. Each case is unique, No two cases are similar என்பதையும் நினைவில் கொள்வதும் அவசியம்.

மரண தண்டனை எதிர்ப்பாளர்கள், ஒரு நாகரீகமான சமூகத்தில், அரசாங்கமே, தண்டனை என்ற பெயரில் ஒரு 'கொலையை'ச் செய்வதை அநாகரீகமான செயலாகவும், மனித மேம்போக்குச் சிந்தனைக்கு ஒவ்வாத ஒன்றாகவும் பார்க்கிறார்கள் ! இதிலும், முரண் உள்ளது !!! இப்படி, பொத்தாம் பொதுவாக, 'நாகரீக' சமுதாயம் மரண தண்டனையை ஒழிக்க வேண்டும் என்று சொல்பவர்களுக்கு, திட்டம் தீட்டி, குண்டு வைத்து அப்பாவி மக்களைக் கொல்லும் தீவிரவாதம், எதிர்க்கத் திராணியில்லா இளம் சிறுமியை வன்புணர்ந்துக் கொல்லும் வக்ரம் போன்றவைகளில் ஈடுபடும் கயவர்கள், "நாகரீக" சமுதாயத்திலிருந்து களையப்பட வேண்டியவர்களே என்ற பதிலை கூற இயலும். மரண தண்டனையை எதிர்ப்பவர்களின் "பொதுப்புத்தி" என்று அவர்கள் கூறும் காரணங்களையும் எளிதாக நிராகரிக்க இயலும் !!!

போரில் ஈடுபடுவதும், மிருகங்களை மதத்தின் பெயரால் பலியிடுவதும் கூட நாகரீகமான சமுதாயங்கள் செய்யக் கூடாதது தான் ! தீவிரமான குற்றங்களால், தனிப்பட்ட அளவில் பெருமளவு பாதிக்கப்பட்ட / பாதிக்கப்படும் வாய்ப்புள்ள ஜீவன்களுக்கும், சாதாரண பொதுமக்களுக்கும், அரசும், சட்டமும், சமூகமும் நம்பிக்கையூட்டும் வண்ணம் செயலாற்றுவது மிக அவசியம் ! சமூகத்திற்கு அது கடமையும் கூட ! இதையே மிக முக்கியமானதாகக் கருதுகிறேன்.

அடுத்து, அ·ப்சலின் குடும்பத்தினரை குடியரசுத் தலைவர் சந்தித்தது சரியான ஒன்றா ? குடியரசுத் தலைவர் தங்களைச் சந்திக்க வேண்டும் என்று மரண தண்டனை விதிக்கப்பட்ட ஒவ்வொரு குற்றவாளியின் குடும்பமும் எதிர்பார்த்தால் என்ன செய்வது ? இப்போது சந்தித்தது, ஒரு தவறான முன்னுதாரணம் ஆகி விடாதா ? மேலும், குடியரசுத் தலைவர் நேரடியாக மன்னிப்பை வழங்குவதில்லை, காபினெட் வழங்கிய மன்னிப்பை ஊர்ஜிதம் செய்கிறார், அவ்வளவே ! இந்த விஷயம் பலருக்குத் தெரியாமல் இருக்கலாம்.

(போலி)மதச்சார்பின்மையை போற்றும் அரசியல் கட்சிகளைச் சேர்ந்த அரசியல்வாதிகள் (இவர்களை காப்பாற்றத் தான் ராணுவ வீரர்கள் பலர் உயிர்த் தியாகம் செய்தார்கள்!) தற்போது வாய் மூடி மௌனிகளாக இருப்பது வேதனையான ஒரு விஷயம். இவர்களின் வேஷம் அடிக்கடி இப்படி கலைவதும் நல்லது தான், என்ன, மக்கள் புரிந்து கொள்ள வேண்டும். புரிந்து கொண்டால் சரி !

என்றென்றும் அன்புடன்
பாலா

*** 239 ***

கிராமத்து அரட்டை அரசியல் - 1

நண்பர் அனானி மெயிலில் அனுப்பிய அரசியல் அரட்டைக் கச்சேரி, பதிவாக ! கச்சேரியைத் தொடருவாராம், பார்ப்போம் ! என்சாய், நண்பர்களே :-)))

******************

""என்னண்ணே...என்ன விசேசம்""" என்றபடி வந்தான் மலையாண்டி

மூக்கையா ரொம்ப சீரியஸாக " டி.வி பெட்டி மேல விளுந்து ஒரு பச்ச புள்ள செத்துப் போயிடுச்சாம்பா " என்றார்

"எந்த டி.வி பெட்டிண்ணே..இப்ப இலவசமா கொடுத்தாங்களே அதுவா"

"அடப்பாவி..எதுக்கும் எதுக்கும் முடிச்சு போடுற..ஏண்டா உங்க உலக அறிவை வளக்க டி.வி பெட்டி குடுத்தா அதுல கூடவாட பாலிடிக்ஸ் பண்ணுவீங்க... பாவிப்பய புள்ளைகளா "

"நீங்க மட்டும் ஊருல சிக்குன் குனியா நோய் பரவிக்கிடக்கு..அவனவன் மூட்டுக்கு மூட்டு வலிக்குதுன்னு மொடங்கிப் போய் கெடக்கான்... கேப்பார்..தடுப்பார் யாருமில்லையா அப்படீன்னதுக்கு....கொசு கடிச்சது என்னமோ இப்பதான்..ஆனா சிக்குன் குனியா கொசு முட்டை உருனானது இதுக்கு முந்துன ஆட்சில அப்படீனூ சொன்னீங்களே"

"உண்மைதானேடா அது...போன ஆட்சில போட்ட முட்டைதானடா இப்ப கொசுவா மாறி கடிச்சு சிக்குன் குனியா பரவி பாடா படுத்துது. "

"எல்லாம் போன ஆட்சியிலதான் அப்படீன்னா நீங்க வரிப்பணத்தையும் அரசாங்க நிலத்தையும் வாரிக்குடுத்தது தவிர வேற என்ன பண்ணி கிழிச்சீங்க இதுவரைக்கும்"

" டேய்...நடக்குமான்னு இருந்த சூரியா-ஜோதிகா கல்யாணமே எங்க ஆட்சிலதாண்டா நடந்தது..ஒங்க அஞ்சு வருச ஆட்சீல காதலர்களை ஒண்ணா சேக்க முடிஞ்சுதாடா ..பேச வந்துட்டான்..அடுத்து பார்ரா செல்வராகவன் - சோனியா அகர்வால் கல்யாணத்தையும் முடிச்சு வச்சு ரெட்டை விழா எடுத்துக் காட்டுரோம்"

அப்பொழுது வெற்றிலை பாக்கு மென்று கொண்டே வந்தவரைப் பாத்து மூக்கையா

" வா..மணி...உங்க கட்சி சார்பா "தமிழன் " அப்படீன்னு டிவி சானல் தடபுடலா ஆரம்பிச்சுட்டாங்க போல இருக்கே"

"ஆமண்னே...பின்ன எங்க கட்சியும் தேசிய அளவுல வளந்துருச்சுல்ல..பின்ன ஒளிஊடகம் இல்லையின்னா எப்படி"

"சொன்னாங்கப்பா..உங்க மத்திய அமைச்சர் கூட நிகழ்ச்சிக்கு வெள்ளை சொள்ளையா வேட்டியெல்லாம் கட்டிக்கிட்டு வந்தாராமே..அதுவும் பழக்கமில்லாததால சங்கடமா இழுத்து இழுத்து விட்டுக்கிட்டு உக்காந்திருந்தாராமே...இவன் கிண்டலடிச்சுக்கிட்டுருந்தான் ..எதுக்கப்பா ...எப்பவும் போல எங்க பேரப்புள்ளை மாதிரி சூட்டும் கோட்டுமா வர வேண்டியதுதானே"

"இல்ல...முக்கய்யண்ணே..தமிழ் நிகழ்ச்சிக்கு பொருத்தமான தமிழர் உடையில வர்ரதுதான சபை மரியாதை அதுதான்"

"ஆமா..உழவர் சந்தை திறப்பு விழான்னு கூப்பிட்டா என்ன உடுப்புல வருவாராம் ??? " என்று மலையாண்டி முனகினான்.

"என்னாடா முனகுற " என்றனர் மூக்கையாவும் மணியும்.

" ஒண்ணுமில்லை... மத்தவங்க மாதிரி டெல்லிக்கும் வேட்டி கட்டிகிட்டு போக வேண்டியதுதான..அங்க மட்டும் தமிழர் பண்பாட்டைக் காப்பாத்த வேண்டாமா ?"

"டேய் ...அந்த ஊர்க்காரன் வேட்டியப் பாத்து படிக்காதவன்னு தப்பு கணக்கு போட்டுருவான்ல...இவரு டாக்டருல்ல..அதான் " என்றார் மூக்கையா

" அதெல்லாம் ஒண்ணுமில்லை...வேட்டி அவுந்துருச்சின்னா அவமானமாயிருமில்லை..அதுதான்..தமிழ்நாட்டுலன்னா அவுந்தா கூட அவமானமில்லை...தானா அவுரலை ... நாங்கதான் எதிர்ப்பு போராட்டம் நடத்தினோம் அப்படீன்னு சொல்லி சமாளிச்சுரலாம் "

"டேய்...அவுத்து காட்டுனது ஒங்க கட்சி ஆளுங்க..தோத்த கடுப்புல என்ன வேணா பேசுவியா" என்று மணி அடிக்கப் போக மூக்கையா "அட விடுங்கப்பா" என சமாதானப்படுத்தப் புக....மலையாண்டி ஏதோ சொல்ல அந்த இடமே உண்மையான தமிழக சட்டமன்றம் போல மாறியதால் கிராமத்து அரசியல் மேடை தற்காலிகமாக கலைந்தது.

கிராமத்து அரசியல் அரட்டை தொடரும் :)

*** 240 ***

திவ்யதேசம் 5 - திருப்பேர் நகர் (கோவிலடி)

இவ்வைணவ திருத்தலம் திருச்சிக்கு அருகில், லால்குடியிலிருந்து சுமார் 10 கிமீ தொலைவில், கொள்ளிடத்தின் தெற்குக் கரையில், கோயிலடி என்ற ஊரில் அமைந்துள்ளது. இந்த திவ்யதேசம், இந்திரகிரி மற்றும் பலாசவனம் என்ற புராதனப் பெயர்களாலும் அறியப்படுகிறது. இத்திருத்தலம், கர்னாடகத்தில் உள்ள ஸ்ரீரங்கபட்டினம், ஸ்ரீரங்கம், கும்பகோணம் மற்றும் மயிலாடுதுறை ஆகிய ஐந்து தலங்களும் பஞ்சரங்க ஷேத்திரங்கள் எனப்படுகின்றன. இங்குள்ள ராஜகோபுரம், நுட்பமான, அழகிய வேலைப்பாடுகள் நிறைந்தது. இரட்டை பிரகாரங்களுடன், கிட்டத்தட்ட 2.5 ஏக்கர் நிலப்பரப்பில், இக்கோயில் அமைந்துள்ளது.

இவ்வாலயம், இந்திரகிரி என்று அழைக்கப்படும் சிறு குன்றின் மேல் அமைந்துள்ளது. இங்கு அருள்பாலிக்கும் மூலவர், அப்பக்குடத்தான் (அப்பலா ரங்கநாதர்), மேற்கு நோக்கிய கிடந்த திருக்கோலத்தில், புஜங்க சயனத்தில், உபமன்யு (என்கிற மார்க்கண்டேய) முனிவரை வலக்கையால் அணைத்து ரட்சித்தவாறும், பால் நிறைந்த அப்பக்குடத்தை இடக்கையில் ஏந்தியும், காட்சியளிக்கிறார். தாயாரின் திருநாமங்கள் இந்திரதேவி மற்றும் கமலவல்லி.

தீர்த்தமும், விமானமும் முறையே இந்திர தீர்த்தம் மற்றும் இந்திர விமானம் என்று அறியப்படுகின்றன. பெரியாழ்வார் (பெரியாழ்வார் திருமொழி, இரண்டாம் பத்தில் 2 பாசுரங்கள்), திருமங்கையாழ்வார் (பெரிய திருமொழியில் 17 பாசுரங்கள் மற்றும் பெரிய, சிறிய திருமடல்களில் 2 பாசுரங்கள்), திருமழிசையாழ்வார் (நான்முகன் திருவந்தாதியில் ஒரு பாசுரம்) மற்றும் நம்மாழ்வார் (திருவாய்மொழி 10ஆம் பத்தில் 11 பாசுரங்கள்), இந்த திவ்ய தேசத்தை மங்களாசாசனம் செய்துள்ளனர். பெரிய திருமொழி பாசுரங்கள் சில:
**************************
991@
ஊராங்குடந்தை உத்தமன்* ஒருகாலிருகால் சிலைவளைய*
தேராவரக்கர் தேர்வெள்ளம் செற்றான்* வற்றாவருபுனல்சூழ் பேரான்*
பேராயிரமுடையான்* பிறங்குசிறை வண்டறைகின்ற தாரான்*
தாராவயல்சூழ்ந்த* சாளக்கிராமம் அடைநெஞ்சே. 1.5.4

திருவூரகத்து ஸ்ரீமூர்த்தியும், திருக்குடந்தை புருஷோத்தமனும், தன் வில்லால் அசுரரை மாய்த்த ஸ்ரீராமனும் ஆன எம்பெருமான், வற்றாத காவிரி சூழ்ந்த திருப்பேரில் யோக நித்திரையில் உள்ளான் ! ஆயிரம் திருநாமங்களை உடையவனும், மணங்கமழ் துளசி மாலையைத் தன் திருமார்பில் அணிந்தவனும் ஆன அவ்வண்ணலை, அழகிய நீர்ப்பறவைகள் மிக்க செழிப்பான வயல்கள் கொண்ட சாளக்கிராமம் சென்று, பற்றிடு, என் நெஞ்சமே !
**********************
1399@..
பேரானைக்* குறுங்குடி எம்பெருமானை*திருதண்கால்
ஊரானைக்* கரம்பனூர் உத்தமனை*முத்திலங்கு
காரார் திண்கடலேழும்* மலையேழ் இவ்வுலகேழுண்டும்*
ஆராதென்றிருந்தானைக்* கண்டது தென்னரங்கத்தே (5.6.2)

திருப்பேரானும், திருக்குறுங்குடி எம்பெருமானும், திருத்தண்கால் ஊரின் நாயகனும், திருக்கரம்பனூர் உத்தமனும் ஆன சர்வலோக சரண்யன், ஏழு உலகங்களையும், ஏழு மலைகளையும், ஏழு கடல்களையும் (அவற்றை காத்தருள வேண்டி!) விழுங்கிய பின்னரும் (தன் ரட்சித்தலை தொடர வேண்டி!) திருப்தி அடையாதவனாக, ஸ்ரீரங்கத்தில் பள்ளி கொண்ட பெருமாளாக, அருள் பாலிக்கிறான்.
************************
1432@
வக்கரன் வாய்முன்கீண்ட* மாயனே என்று வானேர்ப்புக்கு*
அரண்தந்துஅருளாயென்ன* பொன்னாகத்தானை*
நக்கரியுருவமாகி* நகங்கிளர்ந்து இடந்துகந்த*
சக்கரச்செல்வன் தென்பேர்த்* தலைவன்தாள் அடைந்துய்ந்தேனே (5.9.5)

கண்ணபிரானாக அசுரனின் வாய் பிளந்து அவனை மாய்த்து தேவர்களை காத்தான். அவனே, பொன்னொளி மின்ன சிம்ம அவதாரமெடுத்து, கொடிய ஹிரண்யனின் உடலை உன் கூரிய நகங்களால் கிழித்து மாய்த்தான். தன் கையில் திருச்சக்கரம் ஏந்தி, திருப்பேர் நகரில் பள்ளி கொண்ட எம்பெருமானின் திருவடி பற்றி நான் உய்வுற்றேனே !
************************
1436@
நால்வகைவேதம் ஐந்துவேள்வி* ஆறங்கம் வல்லார்*
மேலை வானவரில்மிக்க* வேதியர் ஆதிகாலம்*
சேலுகள்வயல் திருப்பேர்ச்* செங்கண்மாலோடும் வாழ்வார்*
சீலமாதவத்தர் சிந்தையாளி* என்சிந்தையானே (5.9.9)

நான்கு வேதங்கள் ஐந்து யாகங்கள் மற்றும் வேதாந்தத்தின் ஆறு அங்கங்கள் பற்றி நன்கு கற்றறிந்தவரும் வானவருக்கும் மேலானவரும், வெகு காலமாக வயல் சூழ்ந்த திருப்பேர் நகரில் திருமாலோடு சேர்ந்து வாழ்ந்து வருகின்றனர். அத்தகைய சான்றோரின் நெஞ்சில் வாழும் அவ்வண்ணலே என் நெஞ்சிலும் நீக்கமற நிறைந்துள்ளான்.
***************************
1851@
துளக்கமில் சுடரை,* அவுணனுடல்-
பிளக்கும் மைந்தனைப்* பேரில் வணங்கிப்போய்*
அளப்பில் ஆரமுதை* அமரர்க்கு அருள்-
விளக்கினை* சென்று வெள்ளறைக் காண்டுமே 10.1.4

என்றும் ஒளி குறையா பெருஞ்சுடர் போன்றவனை, ஹிரண்யனின் உடல் பிளந்த வலிமை மிக்கவனை, நாம் திருப்பேர் நகர் சென்று அடி பணிவோம். உண்ண உண்ண திகட்டாத அமுதம் போன்றவனை, நித்யசூரிகளுக்கு அருள் விளக்காய் இருப்பவனை, இன்றே திருவெள்ளறை நகர் சென்று, அவன் மலரடி பற்றி நாம் வணங்குவோமாக !
************************

தலபுராணம் குறித்து: எம்பெருமான், அடியார்களின் இதயத்திலிருந்தும், அவ்வுறைவிடத்திலிருந்தும், தன்னை "பெயர்த்தெடுப்பது" இயலாத ஒன்று என்பதை உணர்த்துவதின் காரணமாக, திருப்பேர் நகர் என்று இத்தலம் அழைக்கப்படுகிறது. இத்தல புராணம் குறித்து வேத வியாசரின் பிரும்மாண்ட புராணத்திலும் சொல்லப்பட்டுள்ளது. உபமன்யு முனி, குழந்தையாக இருக்கையில் ஒரு முறை பசியால் அழுதபோது, சிவபெருமான் திருப்பாற்கடல் பாலை அவருக்கு அளித்த தகவல் சிவபுராணத்தில் உள்ளது. சிவபெருமான் தன் பக்தரான உபமன்யு முனிக்கு தந்த தரிசனம் முழுமை பெறும் வண்ணம், திருமாலும் முனிவருக்கு உதவியருளுவது போல் இங்கு அமைந்துள்ளது சிறப்பு !

இத்திருச்செயலுடன் தொடர்புடைய பழங்கதை ஒன்று, தலப்பெருமாளுக்கு "அப்பக்குடத்தான்" என்ற திருநாமம் ஏற்பட்ட காரணத்தை சுவைபடச் சொல்கிறது ! உபரிசரவசு என்ற பாண்டிய மன்னன், மதம் பிடித்த ஒரு யானையை வேட்டையாடச் சென்றபோது, தவம் செய்து கொண்டிருந்த ஒரு யோகியை தவறுதலாகக் கொன்று விட்டான். அதனால் மனமுடைந்த அவன், தன் அரச பதவியைத் துறந்து, பாப விமோசனம் வேண்டி, திருப்பேர் நகரில் கடுந்தவம் செய்தவுடன், சிவபெருமான், மன்னன் முன் தோன்றி, அருளாசிகள் வழங்கி, அவ்விடத்தில் பெருமாள் கோயில் ஒன்றைக் கட்டுமாறு பணித்தார்.

ஸ்ரீமன் நாராயணன், அவனுக்கு பாப விமோசனம் அளிக்கும் வரை, தினம் பெருமாளைத் தொழுது, பிராமணர்களுக்கு அப்பத்தையும், பாயசத்தையும் பிட்சையாக வழங்குமாறும் சிவபெருமான் கூறினார். அதன்படி, திருப்பேர் நகரில் கோயில் கட்டிய உபரிசரவசு, தினம் அவ்வாறே பிட்சை வழங்கி வந்தான். ஒரு நாள், பெருமாள், ஓர் ஏழை பிராமணர் உருவில் மன்னன் முன் வந்து, தான் நெடுந்தூரத்தில் இருந்து வருவாதாயும், கடும்பசியில் உள்ளதாயும் கூறி, உணவளிக்குமாறு வேண்டினார். நூறு பேருக்கான உணவை (அப்பங்களை) உண்ட பின்னரும் பெருமாள் தன் பசி தீர்ந்தபாடில்லை என்றுரைத்ததால், மேலும் உணவு சமைத்து வழங்க சற்று நேரம் ஆகுமென்பதால், பெருமாளை தன் வீட்டில் ஓய்வெடுத்துக் கொள்ளுமாறு மன்னன் வேண்டினான்.

அதே நேரத்தில், தன் பக்தனான மார்க்கண்டேயரின் முன் தோன்றிய சிவபெருமான், திருப்பேர் நகரில், ஒரு ஏழை பிராமணர் வடிவில், பெருமாள் வந்து தங்கியிருக்கும் விஷயத்தை (மார்க்கண்டேயர் தனது 16-வது வயதில் மரணம் அடைவார் என்று விதிக்கப்பட்ட காரணத்தின் பேரில்) அவரிடம் கூறி, அவருக்கு இறவா வரம் கிடைக்க, பெருமாளின் அருளாசியைப் பெறுவதே ஒரே வழி என்று கூறி மறைந்தார்.

மன்னனின் வீட்டுக்குச் சென்ற மார்க்கண்டேய ரிஷி, சயன கோலத்தில், ஒரு கையில் அப்பக்குடத்துடன் இருந்த ஏழை பிராமணரை நூறு முறை பணிந்தெழுந்தார். உடனே பெருமாள் அவருக்குத் தன் சுயரூபம் காட்டி, வலக்கையை உயர்த்தி அவரை ஆசிர்வதித்து, இறவா வரமளித்தார். உபரிசரவசுவுக்கும் சாப விமோசனம் வழங்கினார்.

மார்க்கண்டேயருக்கு ஆசி வழங்கிய அத்திருகோலத்திலேயே, திருப்பேர் நகரில் மூலவர் காட்சியளிக்கிறார். பெருமாளுக்கு தினமும் இரவில் அப்பம் பிரசாதமாக நைவேத்யம் செய்வதும் மரபானது. மார்க்கண்டேய ரிஷி இத்திருத்தலத்தில் இறவா வரம் வேண்டிப் பெற்றதால், அவர் தினம் ஸ்நானம் செய்த குளம் மிருத்யு விநாசினி என்று போற்றப்படுகிறது.

நம்மாழ்வார் திருவாய்மொழியின் முடிவில் எழுதிய திருப்பாசுரங்கள் இத்தலப் பெருமாளின் புகழ் பாடுவதை வைத்து, அவர் திருப்பேர் நகரில் மோட்சம் அடைந்ததாக நம்பப்படுகிறது. நம்மாழ்வார் இப்பதினோரு பாசுரங்களில், பெருமாள் திருமாலிருஞ்சோலையிலிருந்து திருப்பேர் நகர் வந்து, மாந்தர்க்கு காட்சியளித்து, தன் திருவயிற்று அப்பங்களை அவர்கட்கு வழங்கி, பசித்துயரை போக்குவதாகப் பாடியுள்ளார் ! "ஆரா வயிற்றானை அடங்கப் பிடித்தேனே" என்று உருகுகிறார் !!!
****************
3860@..
திருமாலிருஞ்சோலை மலை* என்றேன் என்ன*
திருமால்வந்து* என்னெஞ்சு நிறையப் புகுந்தான்*
குருமா மணியுந்து புனல்* பொன்னித் தென்பால்*
திருமால்சென்று சேர்விடம்* தென் திருப்பேரே. (2) 10.8.1

3861@
பேரே உறைகின்ற பிரான்* இன்று வந்து*
பேரேனென்று* என்னெஞ்சு நிறையப் புகுந்தான்*
காரேழ் கடலேழ்* மலையேழ் உலகுண்டும்*
ஆராவயிற்றானை* அடங்கப் பிடித்தேனே. 10.8.2

3862@
பிடித்தேன் பிறவி கெடுத்தேன்* பிணிசாரேன்*
மடித்தேன் மனைவாழ்க்கையுள்* நிற்பதோர் மாயையை*
கொடிக் கோபுரமாடங்கள்சூழ்* திருப்பேரான்*
அடிச்சேர்வது எனக்கு* எளிதாயின வாறே. 10.8.3

3869@..
உற்றேன் உகந்து பணிசெய்து* உனபாதம்-
பெற்றேன்* ஈதே இன்னம்* வேண்டுவது எந்தாய்*
கற்றார் மறைவாணர்கள்வாழ்* திருப்பேராற்கு*
அற்றார் அடியார் தமக்கு* அல்லல் நில்லாவே. (2) 10.8.10.
*********************

வைகுண்ட ஏகாதசியும், பங்குனி பிரம்மோத்சவமும் இங்கு சிறப்பாகக் கொண்டாடப்படுகிறது. தினமும், பெருமாளுக்கு 'ஆறு கால பூஜை' நடைபெறுவது மரபு. இக்கோயிலுக்கு சோழ மற்றும் விஜயநகர மன்னர்கள் செய்த திருத்தொண்டுகள் பற்றிய கல்வெட்டுக் குறிப்புகள் இங்கு காணப்படுகின்றன.

என்றென்றும் அன்புடன்
பாலா

*** 238 ***

முகத்தில் கரி அல்லது உவமைக் கருத்து !

இன்று அனானி ஒருவர் மின்மடலில் தான் எழுதி அனுப்பியதை (அவர் வலைப்பதிவர் இல்லை என்பதால்) என்னுடைய வலைப்பதிவில் இடுமாறு வேண்டுகோள் விடுத்திருந்தார். "குட்டிக்கதை" வாயிலாக, அவர் கருத்தை சொல்லியிருப்பது சிறப்பு ! "யான் பெற்ற இன்பம் பெறுக இவ்வையகம்" என்ற பரந்த நோக்கில் இப்பதிவை இடுகிறேன் :)
****************************

""பூசிட்டாங்க...பூசிட்டாங்க"" என்றபடியே ப்ளூட் கண்னன் ஓடி வந்தான்

" என்னாடா பூசிட்டாங்க" பேப்பர் படித்துக் கொண்டிருந்த அப்பா கேட்டார்

"மூஞ்சீல கரி பூசிட்டாங்கப்ப " என்றான் ப்ளூட் கண்ணன்

" யார் மூஞ்சீலடா கரி பூசிட்டாங்க..யார் பூசுனது "

"அப்பா நம்ம தெருவுல சுதந்துரமா திரிஞ்சுக்கிட்டு இருந்த சின்னப்பசங்க மூஞ்சிலதாம்பா..பக்கத்து வூட்டு போலிஸ் மாமா பூசிட்டாரு"

"எதுக்குடா...எப்ப பூசுனாரு "

"அப்பா..இவனுங்க எப்ப பாத்தாலும் அவரைப் பாத்தா "குட் மார்னிங்" அப்படீன்னு சொல்லிக்கிட்டு திரிஞ்சானுங்க..அவரு டேய்...தமிழ்ல வணக்கம் அப்படீன்னு சொல்லுங்க...நீங்களெல்லாம் தமிழ் நாட்டுல இருக்குறீங்க."அப்படீன்னாரு

" இவனுங்க...எங்களுக்கு இதுதான் டக்குனு வருது..சொல்ல சுளுவா இருக்கு...புடிச்சிருக்கு ...அப்படீன்னு சொல்லிட்டிருந்தாங்க...ஒரு நா அடிக்கப் போயிட்டாரு..அப்பவும் சொன்னதக் கேக்கல.. "

"சரி..இப்ப என்னாச்சு "

'அவரு பெரியண்ணன் ஊருலேந்து வந்திருக்காரு..அவரும் போலிஸ்காரர்தான்...அல்லா பசங்களையும் கூப்பிட்டு..பசங்களா தெனத்துக்கும் தமிழ்ல அழகா "வணக்கம்" அப்படீன்னு சொன்னா சொன்னவனுங்களுக்கு தெனமும் ஒரு ரூபா தருவேன்.நீங்களும் இனிப்பு வாங்கி சாப்பிடலாம் அப்படீன்னாரு.இதக் கேட்ட ரெண்டு பசங்க உடனே" வனுக்கோம் ஐயா " அப்படீன்னு தப்பு தப்பா சொன்னாங்க..அவரும் இப்பிடியாவது சொல்ல ஆரப்பிச்சுட்டாங்களேன்னு சொன்னவனுக்கெல்லாம் ஒரு ரூபா குடுத்தாரு. அதுனால முன்னால சொல்ல முடியாது , தெரியாதூன்னு சுத்திக்கிட்டிருந்தவன்...அவனுக பாவம் சொல்லாட்டி என்ன விடுருங்க.. அப்படீன்னு சொன்னவன் ஆல்லார் மூஞ்சிலையும் கரி பூசிட்டாருல்ல ..ஹா..ஹா..ஹா..ஹே..ஹே..ஹே"
என்று உருண்டு பிரண்டு சிரித்தான் ப்ளூட் கண்ணன்

" ஏன்டா...ஆப்சன் குடுத்தாரு..அது யாருக்கு தேவையோ..யாருக்கு ஒத்து வருதோ அவங்க எடுத்துக்கிட்டாங்க....இவருக்கும் ஏதோ தமிழ் மற்றும் தம்பி மானம் காத்த திருப்தி இருக்கும்...அந்தப் பையன்களுக்கும் யாரும் கட்டாயப் படுத்தலை ..காசு கிடைச்ச சந்தோசம் இருக்கும்....இதுல மூஞ்சில கரி எங்கடா வந்தது..வேன்ணா மெரட்டிப்பாத்த தம்பி போலிஸ் மூஞ்சில கரி அப்படீன்னு சொல்லு ஒத்துக்கலாம் "

" ஆ...அதெப்படி ...மொதல்ல தெரியாது...வராது...முடியாது...நல்லால்லை அப்படீன்னு சொல்லிக்கிடுல்ல திரிஞ்சானுங்க...இப்ப காசுன்னதும் டக்குனு மாறிட்டானே..அப்ப மொதல்ல சொன்னது பொய்தானெ...பொய் சொன்னவன் மூஞ்சில கரிதான?"

"டேய்...ரெண்டு வாரம் முன்ன அம்மாவுக்கு காச்சல்..டாக்டர்கிட்ட நாந்தான் கூட்டிக்கிட்டு போகணும். சனிக்கிழமை வேலைக்கு போகலை..மேனேஜர் கூப்பிட்டு சனிக்கிழமை வேலைக்கு வரலையின்னா..டிஸ்மிஸ் அப்படீன்னாரு..நானும் " யோவ் ...சனிக்கிழமை லீவு..லீவு நாள்ள என் பொண்டாட்டிய உடம்பு சரியில்லைன்னு டாக்டர்கிட்ட கூட்டிட்டு போறத நீ என்னா தடுக்குறது அப்படீன்னு சண்டை போட்டேன் .அடுத்து வந்த சனிக்கிழமையும் அம்மாவுக்கு சிக்குன் குனியா சரியாகலை. ஆனா அந்த சனிக்கிழமை வேலைக்கு வந்தா ரெண்டு நாள் சம்பளம் அதிகமா கிடைக்கும் அப்படீன்னாங்க..அதிகம் பணம் வந்தால் அம்மா மருந்துக்கு ஆகுமே..டாக்டர்கிட்ட சாயங்காலம் போகலாம் அப்படீன்னு முடிவு பண்ணி வேலைக்கு போயிட்டேன்...வேலைக்கு போனதுனால...உங்கம்மா காய்ச்சல் பொய்யீன்னு ஆயிடுமா...தேவைக்கேத்த மாதிரி முடிவெடுத்தேன்...காசு நம்மகிட்ட நிறைய இருந்திருந்தா இப்ப கூட வேலைக்கு போகாம உங்கம்மா கூட ஆஸ்பத்திரி போயிருப்பேன்" அது போலத்தாண்டா இது...இதைப் போய் பெருசா மூஞ்சில கரி...***ல சொறி அப்படீன்னு ஏண்டா சொல்லிக்கிட்டு திரியுற..போ..போ.போய் உருப்படியா வேலை இருந்தா பார் " என்ரார் அப்பா.

இவ்வளவு சொல்லியும் ப்ளுட் கண்ணன் குழப்பமாக " இல்லைப்பா...காலேல மூஞ்சில கரியப் பாத்தேன் " என்றான்

அப்போதுதான் அவனை நிமிர்ந்து பார்த்த அப்பா " அட..கரிக்கு பொறந்தவனே..நைட்டு தூங்கும் போது பக்கத்திலிருந்த வென்னித்தவலைய கட்டிப்புடிச்சிருக்க..அதுல இருந்த கரி ஓம்மூஞ்சில ஒட்டியிருந்துருக்கு...காலேல கண்ணாடில அதப் பாத்துட்டு " எதுக்க உள்ளவன் மூஞ்சில கரி " அப்படீன்னு இந்த ஆர்ப்பாட்டம் பண்ணுறயே..போ..போயி மூஞ்சிய கழுவிட்டு ...அடுத்தவனை குறை சொல்றதை நிப்பாட்டணும்....எனக்கு இனிமேலாவது நல்ல புத்திய குடு தாயி..அப்படீன்னு குலதெய்வத்தை கும்பிட்டுட்டு வேலையப்பாரு.போடா" என்றார்.

*** 237 ***

On PMK .. Stalin ... Periyar - ஆ.வியில் சோ

கேள்வி: கடந்த சட்டமன்ற தேர்தலுக்குப் பிறகு பா.ம.க தனது சொந்த இடங்களிலேயே வெற்றி வாய்ப்பை இழந்திருக்கிறது. அதற்குப் பழைய வலிமை இல்லை என்கிறார்களே ?

பதில்: பா.ம.க வை தமிழகத்தின் தனிப்பெரும் கட்சியாக நான் கருதவில்லை. "நீயும் விட்டு விடு, நானும் சேர்த்துக்க மாட்டேன்" என்று தமிழ்நாட்டின் இரண்டு பெரிய கட்சிகளும் இவர்களை கை விட்டு விட்டால், அந்த தேர்தலோடு அந்தக் கட்சி ஒரு முடிவுக்கு வந்து விடும் (அப்படி ஒரு நிலை வந்தால் பா.ம.க வின் உண்மையான பலம் தெரிய வாய்ப்புள்ளது). இரண்டு அணிகளிலும் சாராமல் தனியாக நின்றால், அவர்களால் இரண்டு ஸீட் கூட ஜெயிக்க முடியாது !
*********************

கேள்வி: உள்ளாட்சி தேர்தலுக்குப் பிறகு முதலமைச்சர் பொறுப்பு ஸ்டாலினுக்கு வழங்கப்படும் என்ற கருத்து தொடர்ந்து பேசப்பட்டு வருகிறதே ?

பதில்: அப்படி நடந்தால் அதில் தவறு ஒன்றும் இல்லை. ஸ்டாலினுக்கு தலைமைப்பதவி கொடுப்பது என்பது திமுகவைப் பொறுத்தவரை இயல்பான ஒன்று தான். திமுக தலைமைக்கே கூட ஸ்டாலினை விட்டு விட்டு, வேறு யாரையாவது கொண்டு வந்தால், கட்சி கட்டுக்கோப்பாக இருக்காது. மூப்பனாரின் மறைவுக்குப் பின் அவர் மகன் ஜிகே வாசனை அரசியலுக்கு அழைத்து வந்தார்கள். அன்றைக்கு அவரோடு வந்த தமாகவினர் இன்றைக்கும் காங்கிரஸில் வாசன் பக்கம் தான் இருக்கிறார்கள். ஸ்டாலின் இன்னும் ஒரு படி மேலே ! கிட்டத்தட்ட 30 வருடங்களுக்கு மேல், கட்சியின் அடிமட்ட நிலையில் இருந்து, பல்வேறு பொறுப்புகளில் பணியாற்றி விட்டுத் தான் தற்போதைய இடத்துக்கு வந்திருக்கிறார். அதனால், வாரிசு அரசியல் என்பது இங்கே பொருந்தாது. (கருத்துடன் முழுதும் உடன்படுகிறேன்) அவர் முதலமைச்சராக வந்தால், அந்தப் பொறுப்பில் எப்படிப் பரிமளிக்கப் போகிறார் என்பது வேறு விஷயம் !
*************************

கேள்வி: அண்மையில் பெரியார் சிலைக்கு சிலர் சந்தனம் பூசியது பெரும் சர்ச்சையைக் கிளப்பியது. இதில் உங்கள் கருத்தென்ன ?

பதில்: இந்த விஷயம் பெரியாரை, அவருடைய நினைவுகளைக் கிண்டல் செய்வதற்கு சமமானது. அது காந்தி சிலைக்கு மாமிசம் படைப்பது போன்ற ஒரு செயல் என்று துக்ளக்கில் குறிப்பிட்டிருக்கிறேன். அதே சமயம், பெரியார் சிலையை அவமதித்தவர்கள் பன்றிக் குணம் படைத்தவர்கள் என்று முதல்வர் கொதித்தெழுந்திருக்கிறார். அப்படியானால், முன்பு சேலத்தில் ராமர் படத்துக்குச் செருப்பு மாலை அணிவித்து, ராமரைப் பற்றிய அருவருப்பான வர்ணனைகளை வெளிப்படுத்தி, பெரியாரும் அவரது சீடர்களும் ஊர்வலம் நடத்தினார்களே ... அது என்ன குணம் என்பதையும் முதல்வர் விளக்க வேண்டும் (இப்படி எடக்கு மடக்கா கேட்டா எப்படிங்க ?). இம்மாதிரி செயல்களை ஒரு முறை நியாயப்படுத்தினாலும், அதன் பிறகு அதுவே பல வக்கிரங்களுக்கு இடம் அளித்து விடுகிறது !

--- எ.அ.பாலா

நன்றி: ஆனந்த விகடன்

*** 236 ***

சிறு வயது சிந்தனைகள்-II

***** REPUBLISHED *****

என்னவோ தெரியவில்லை! நம்மில் பலருக்கு பழைய நினைவுகளை அசை போடுவதும், அதனால் ஏற்படும் அலாதியான மனமகிழ்ச்சியும் அடிக்கடி நிகழ்பவையாக உள்ளன. சகோதரி பத்மினி தன் தங்கைக்கு எழுதும் தொடர் கடிதங்களில், தன் சிறுவயது சம்பவங்களை நேர்த்தியாக பதிவு செய்துள்ளார். நமது Bloggers-இல் பலர், தங்கள் வலைப்பதிவுகளில், ஏதாவது ஒரு சந்தர்ப்பத்தில், "அந்த நாளும் மறுபடி வாராதோ?" என்ற தொனியில் எழுதியிருக்கிறார்கள் என்றே கூறுவேன்.

நான் பிறந்து வளர்ந்ததெல்லாம் 'ப்ருந்தாரண்ய ஷேத்ரம்' என்றழைக்கப்படும் திருவல்லிக்கேணியில் தான். தந்தையார் என் சிறு வயதிலேயே தவறி விட்டதால், என் அம்மா வேலைக்குச் செல்ல வேண்டிய சூழ்நிலை உருவானது. அப்போது நான் 3-ஆம் வகுப்பு படித்துக் கொண்டிருந்த கிறித்துவப் பள்ளியின் (Montessori) தலைமையாசிரியரான, மிகுந்த கனிவும் இரக்க குணமும் கொண்ட Johannes அம்மையார் என் அம்மாவை ஆசிரியை பணிக்கு வருமாறு கூறினார்கள்.

என் தாய்வழிப் பாட்டனார் ஓய்வு பெற்ற தலைமையாசிரியர் என்பதாலோ என்னவோ, எனக்கு படிப்பில் ஈடுபாடு இயற்கையாகவே அமைந்திருந்தது. சிலேட்டில் 'a b c d' சரியாக எழுத வரவில்லையென பலமுறை அழுதிருப்பதாக, என் முதல் வகுப்பு ஆசிரியை, காலஞ்சென்ற திருமதி ராஜி, பிற்காலத்தில் கூறி சிரித்திருக்கிறார்கள்! நான் கல்வியார்வத்துடனும், அமைதியான குணமுடனும் காணப்பட்டதால், Johannes அவர்களுக்கு என் மேல் தனிப்பட்ட பிரியம் இருந்தது. கருணையும் கண்டிப்பும் ஒரு சேர அமைந்த அவரிடம் எனக்குப் பிடித்தவை அவரின் முத்து முத்தான கையெழுத்தும், ஆங்கில இலக்கண அறிவும் தான். என் நினைவில் என்றும் வாழும், என் முதல் ஆசான் அவரே ஆவார்.

நான் (ஆறாம் வகுப்பிலிருந்து) இந்து உயர்நிலைப் பள்ளியில் படித்த காலத்திலும், அவரை மரியாதை நிமித்தம் அவ்வப்போது பார்க்கச் செல்வேன். ஒவ்வொரு முறையும் தவறாமல் என் படிப்பைப் பற்றி விசாரிப்பார். அவர் பள்ளிக்கு வரும் பெற்றோர்களிடம் நான் அவர் மாணவன் என்று பெருமிதத்துடன் கூறுவார். தேர்வு சமயங்களில், கிறித்துவ முறைப்படி என்னை மண்டியிட வைத்து ஆசிர்வதித்துத் தான் அனுப்பி வைப்பார்!!! அவரின் அந்த ஆசிர்வாதம் எனக்கு வெகுவாக உதவியது என்று திடமாக நம்பினேன். 1981-இல் அவர் எனக்களித்த நல்லொழுக்கச் சான்றிதழை ஒரு பொக்கிஷம் போல் இன்று வரை பாதுகாத்து வருகிறேன்.

ஒன்று மட்டும் நிச்சயம். அக்காலத்தில் நான் சந்தித்த, தங்கள் பணியை சமூகத் தொண்டாக கருதிய, பள்ளி ஆசிரியர்களைப் போல், தற்காலத்து அன்யோன்யமற்ற அவசர உலகில் வாழும் ஆசிரியர்கள் இல்லை என்றே தோன்றுகிறது. Johannes அவர்கள் இறக்கும் தறுவாயில் என்னை பார்க்க விரும்பினார். நான் செல்வதற்குள், அவர் உயிர் பிரிந்தது என்னுடைய துர்பாக்கியம்.

என் பெண்ணும் நான் பாடம் பயின்ற Montessori பள்ளியில் தான் தன் கல்வியைத் தொடங்க வேண்டும் என்ற எனது விருப்பத்தை அப்போது தலைமையாசிரியராக இருந்த Johannes அவர்களின் மகளிடம் கூறியபோது, அவர் பெரு மகிழ்ச்சி அடைந்தார். சிறிது காலம் அங்கு படித்த என் மகள், இப்போது வேறு பள்ளியில் கல்வி கற்கிறாள். என் இரண்டாவது பெண்ணுக்குத் தான் அந்த கொடுப்பினை இல்லை போலும்!

Johannes அவர்களின் மகளும் சில வருடங்களுக்கு முன் இறந்து போனதால், பள்ளி மூடப்பட்டு, அக்கட்டிடமும் இடிக்கப்பட்டு, அங்கே ஒரு காபிப்பொடி கடையும், ஒரு சிறு Super Market-உம் தோன்றி விட்டன! என் பள்ளி இருந்த இடத்தை கடந்து செல்லும் போதெல்லாம், நெஞ்சு சற்று கனத்துத் தான் போகிறது! நான் படித்த பள்ளி, இலைகளும் மலர்களும் பழங்களும் கூடிய உயிரோட்டமிக்க ஒரு அழகான சிறு மரம் போன்றதென்றால், தற்போதைய கட்டிடம் கிளைகள் தவிர வேறெதுவும் இல்லாத உயிரற்ற ஒரு சூனிய மரமாகவே எனக்கு காட்சியளிக்கிறது. பள்ளி இருந்த காலத்தில், அதன் முகப்பையாவது ஒரு புகைப்படமாக எடுத்து வைத்திருக்கலாம் என்று இப்போது நினைத்து என்ன பயன்? வாழ்வில் மாற்றங்கள் தவிர்க்க முடியாதவை என்றாலும் கூட, சில மாற்றங்களை மனதளவில் நம்மால் ஏற்க முடிவதில்லை!

என்றென்றும் அன்புடன்
பாலா

திவ்ய தேசம் 4 - திருவன்பில்

இந்த வைணவ தருத்தலம் லால்குடியிலிருந்து 8 கிமீ தொலைவில், கல்லணையிலிருந்து கும்பகோணம் செல்லும் பேருந்துப் பாதையில், அன்பில் என்ற இடத்தில் அமைந்துள்ளது. இவ்வைணவ திவ்ய தேசத்திற்கு, திருமாலயந்துறை, (மண்டூகமுனி இங்கு தொழுததால்) மண்டூகபுரி, (பிரம்மன் இங்கு வழிபடதால்) பிரம்மபுரி என்ற பெயர்களும் உண்டு. கொள்ளிடம் நதியின் வடகரையில் அன்பிலும், மறுகரையில் கோயிலடியும் (திருப்பேர் நகர்) அமைந்துள்ளன. காவிரி பாயும் பரப்பின் கரையில் அமைந்துள்ள ஸ்ரீரங்கபட்டினம் (கர்னாடக மாநிலம்), ஸ்ரீரங்கம், அன்பில், கும்பகோணம், இந்தளூர் (மயிலாடுதுறை) ஆகிய ஊர்கள் பஞ்சரங்க ஷேத்திரங்கள் என்று அறியப்படுகின்றன. இப்புண்ணியத் தலத்திற்கு பிரேமபுரி மற்றும் திரிவேணி (காவிரி, நிலத்தடியில் ஓடிய சாவித்திரி மற்றும் பல்குனி நதிகள் சந்திக்கும் இடத்தில் அமைந்திருப்பதால்) என்ற புராதனப் பெயர்களும் உண்டு.


வடிவழகிய நம்பி என்று அழைக்கப்படும் தலப்பெருமாள் கிழக்கு நோக்கி கிடந்த திருக்கோலத்தில் (புஜங்க சயனத்தில்) அருள் பாலிக்கிறார். தாயாருக்கு அழகியவல்லி (சுந்தரவல்லி) நாச்சியார் என்று திருநாமம். உத்சவ மூர்த்தி சுந்தரராஜப் பெருமாள் ஆவார். பெருமாள், தாயார் இருவருமே இங்கு சுந்தர சொரூபமாக காட்சியளிக்கின்றனர் ! விமானம் தாரக விமானம் என்றும், தீர்த்தம் மண்டூக புஷ்கரிணி என்றும் அறியப்படுகின்றன. அன்பிலில், சத்யவாகீஸ்வரரும், சௌந்திரநாயகியும் எழுந்தருளியிருக்கும் பிரசித்தி பெற்ற அன்பிலாலந்துறை சைவ திருத்தலமும் அமைந்துள்ளது.

திருமழிசை ஆழ்வார் நான்முகன் திருவந்தாதியில் ஒரு பாசுரத்தில் இத்தலத்தை மங்களாசாசனம் செய்துள்ளார். இப்பாசுரத்தில், பெருமாள் கிடந்த திருக்கோலத்தில் உள்ள திருக்குடந்தை, திருவெ·கா, திருவள்ளூர், திருவரங்கம், திருப்பேர் நகர், திருப்பாற்கடல் மற்றும் திருவன்பில் ஆகிய ஏழு திருக்கோயில்களும் சுட்டப்பட்டுள்ளன. திருமழிசை பிரான், இவ்வேழு தலங்களில் பாம்புப் படுக்கையில் சயனித்திருக்கும் நெடிய ஆதி நாராயணனின் அடியில் தஞ்சமடைபவரின் உள்ளத்திலும் உணர்விலும் அப்பரந்தாமனே நிறைந்து அவர்களை ஆட்கொள்வான் என்று பாடுகிறார்.

2417@..
நாகத்தணைக் குடந்தை* வெ·கா திருவெவ்வுள்*
நாகத்தணை அரங்கம் பேரன்பில்*
நாகத்தணைப் பாற்கடல் கிடக்கும்* ஆதி நெடுமால்*
அணைப்பார் கருத்தன் ஆவான்.

பிரம்மனும், வால்மீகியும் இங்கு திருமாலை வழிபட்டதாக தல புராணம் சொல்கிறது. அன்பில் திருத்தலம், இவ்விரு சிருஷ்டி கர்த்தாக்களுடன் தொடர்புடையது. அதாவது, பிரம்மன் ஸ்ரீமன் நாராயணனின் திருவடிவத்தை மனதில் கொண்டும், வால்மீகி முனி பெருமாளின் கல்யாண குணங்களை மனதில் கொண்டும், முறையே, உலக உயிர்களையும், அவற்றின் தன்மைகளையும், உலகில் வாழத் தேவையான பொருட்களையும் உருவாக்கினர். இந்த சிருஷ்டிக்குப் பின்னால், (பரந்தாமன் மேல்) அவர்களின் பேரன்பு காணப்படுவதால், இத்தலம் "அன்பில்" என்ற பெயர் பெற்றதாகவும் தல புராணம் கூறுகிறது. உலகில் உள்ள அனைத்தும், அன்பு சார்ந்தவையே என்பதை இத்திருத்தலம் உணர்த்துகிறது !

மற்றொரு பழங்கதை, மண்டூக முனிவர் ஒரு முறை நீருக்கடியில் பெருமாளை நினைந்து கடும் தவத்தில் இருந்தபோது, கோபத்திற்கு பேர் போன துர்வாசர் அவ்வழி வந்ததை கவனிக்கத் தவறியதாகவும், வெகுண்ட அச்சின முனி மண்டூகரை தவளை உருவம் கொள்ளுமாறு சபித்ததாகவும், பின்னர் இத்தலத்தில் பெருமாளை வணங்கியதால் மண்டூகரின் சாபம் நீங்கியதாகவும், கூறுகிறது. அதனால் தான், குளம் மண்டூக புஷ்கரிணி என்று அழைக்கப்படுகிறது.


சோழர்களால் கட்டப்பட்ட ராஜகோபுரம் மூன்று நிலைகள் (3-tier) கொண்டு அமைக்கப்பட்டுள்ளது. கோயிலில் பல அழகிய சிற்பங்கள் காணப்படுகின்றன. சுந்தர சோழன், ஒவ்வொரு முறையும், போருக்குச் செல்வதற்கு முன், தன் உடைவாளை கோயிலின் த்வஜஸ்தம்பத்தின் முன் வைத்து, பெருமாளை வணங்கிச் சென்றதாக, இங்குள்ள கல்வெட்டுக் குறிப்புகள் தெரிவிக்கின்றன. சோழர்கள் இக்கோயிலுக்கு அளித்த மானியங்கள் பற்றிய கல்வெட்டுக் குறிப்புகளும் காணப்படுகின்றன.

என்றென்றும் அன்புடன்
பாலா

photo courtesy: Just.Clicking

* 235 *

பல்லவியும் சரணமும் II - பதிவு 12

சில SPB பாடல்களின் சரணங்கள் கீழே. பல்லவியையும், (முடிந்தால் திரைப்படத்தையும்) கண்டு பிடியுங்களேன்! விடைகள் நாளைய பதிவில், !!! தேவையிருந்தால் மட்டுமே!

ஓருவர் பின்னூட்டமிடும்போது, 4 அல்லது 5 சரணங்களுக்கான பல்லவிகளை மட்டும் பதியவும், அவருக்கு எல்லாவற்றுக்கும் விடை தெரிந்திருந்தாலும் கூட :-))

ஏனெனில், மற்றவர்களும் சற்று முயன்று பார்க்கட்டுமே!

3 பின்னூட்டங்களுக்குப் பிறகு, there are no regulations, it becomes a FREE FOR ALL!

1. நனைந்த பொழுதினில் குளிர்ந்த மனதினில் ஏதோ ஆசை ...

2. பாலைப் போல கள்ளும் கூட வெண்மையானதே, பருகிடாது விளங்கிடாது உண்மையானது ...

3. வட்ட நிலவு அது மேலே போச்சு, கட்டி இழுத்தா ....

4. கன்னி மயக்கத்தில் திருநாள், கையில் குழந்தையும் அதனால்

5. அன்பிலே வாழும் நெஞ்சில் ஆயிரம் பாடலே ...

6. எத்தனைக் காலம் இப்படிப் போகும் என்றொரு கேள்வி நாளை ...

7. கிளிஞ்சல்களே உலையரிசி இவளல்லவோ இளவரசி ...

8. சங்கீதம் பொங்காதோ உன் சின்னச் சிரிப்பில், செந்தூரம் ...

9. எனது வீடு எனது வாழ்வு என்று வாழ்வது வாழ்க்கையா ...

10. சுற்றி வரச் செய்யும் விழியும் சுந்தர மொழிகளும்...

11. விஷயங்கள் பல அறிஞ்சவன் நான், வெவரங்கள் பல புரிஞ்சவன் நான்

12. தெம்மாங்கு பாடிடும் சின்னவிழி மீன்களும், பொன்னூஞ்சல் ஆடிடும்...

என் நினைவுகளிலிருந்து சுரண்டி எடுத்துப் பதித்ததால், சொற்தவறுகள் இருக்கலாம்! மன்னிக்கவும், திருத்தவும்!

என்றென்றும் அன்புடன்
பாலா

புனித ஹஜ் - அரசு மானியம் தொடர்பாக

அலகாபாத் உயர்நீதி மன்றம், ஹஜ் புனிதப்பயணம் மேற்கொள்பவர்களுக்கு மத்திய அரசு பொருளாதாரச் சலுகைகள் வழங்குவதைத் தடுத்து வெளியிட்ட இடைக்கால ஆணைக்கு உச்சநீதி மன்றம் தடை விதித்துள்ளது. மத்திய அரசு, இந்த ஆண்டுக்கான ஹஜ் புனித யாத்திரக்கு வேண்டி, ஏற்கனவே செய்துள்ள ஏற்பாடுகளை கவனத்தில் கொண்டு, இந்த ஆண்டுக்கு மட்டுமே, இத்தடை செல்லுபடியாகும் என்று உச்ச நீதி மன்றம் கூறியுள்ளது.

அரசு வழக்குரைஞர், இத்தடை வழங்கப்படவில்லையெனில், அரசுக்கு பெரும் பொருளிழப்பும், உலக அரங்கில் தலை குனிவும் ஏற்படும் என்று வாதாடினார். மேலும், கிட்டத்தட்ட ஒன்றரை லட்சம் இந்திய ஹஜ் பயணிகள் தங்கும் வசதிக்கான ஏற்பாடுகள் குறித்து சவுதி அரேபிய அரசுடன், மத்திய அரசு ஒப்பந்தம் செய்துள்ளதையும் சுட்டிக் காட்டினார்.

அலகாபாத் உயர் நீதி மன்றம், தன் பார்வைக்கு வந்த சிவசேனாவின் (1995ஆம் ஆண்டு தாக்கல் செய்யப்பட்ட !) மனுவை ஏற்று, ஹஜ் புனித யாத்திரை என்றில்லாமல், அனைத்து மத யாத்திரைகளுக்கும், மத்திய / மாநில அரசுகள் மானியம் / சலுகைகள் வழங்குவதற்கு, இடைக்கால தடை ஆனையை விதித்திருந்தது என்பது குறிப்பிடத்தக்கது. அதே நேரத்தில், யாத்திரிகர்களின் பாதுகாப்புக்கு அரசு ஆவன செய்வதை தடை செய்யவில்லை.

எந்த மத யாத்திரைக்கும் அரசுப்பணத்தை செலவழிக்கக் கூடாது என்று இடைக்கால ஆணை சொல்வதால், இப்பிரச்சினை அரசியல் ஆக்கப்பட மாட்டாது என்று நம்பலாம் ! கத்தோலிகக் கிறித்துவர்கள் புனித பூமியாகக் கருதும் வாடிகனுக்கு யாத்திரை செல்வதற்கு அரசு ஏதாவது மானியம் / சலுகைகள் அளிக்கிறதா என்று விஷயம் தெரிந்தவர்கள் தெளிவுபடுத்தினால் நல்லது. அந்தந்த மதம் சார்ந்த அறக்கட்டளைகள், புனித மதப் பயணங்களுக்கு வேண்டிய உதவிகளை யாத்திரிகர்களுக்கு செய்யலாம் என்பது என் எண்ணம். உயர்நீதி மன்றத்தின் இறுதித் தீர்ப்பு வந்த பிறகு, அரசும், அரசியல்வாதிகளும் என்ன செய்யப் போகிறார்கள் என்று பார்ப்போம் !

--- எ.அ.பாலா

* 233 *